სამართალდამცავებმა ემზარ კვიციანი, რომელიც კოდორის ხეობაში ხელისუფლების წინააღმდეგ ამბოხის მოწყობის ბრალდებით შვიდ წელიწადზე მეტი იძებნებოდა, 28 თებერვალს სავარაუდოდ მოსკოვიდან თბილისში ჩამოფრენის შემდეგ საპასპორტო კონტროლის გავლის დროს დააკავეს.

მას დაუსწრებლად ჰქონდა წინასწარი პატიმრობა შეფარდებული; მას შემდეგ, რაც ბოლოო დღეებში გავრცელდა ცნობები კვიციანის საქართველოში დაბრუნების  განზრახვის შესახებ, პროკურატურამ განაცხადა, რომ მას საზღვარზევე დააკავებდნენ.

კვიციანის ოჯახის წევრებმა განაცხადეს, რომ ის შეგნებულად წავიდა ამ ნაბიჯზე, რადგან ახალი ხელისუფლების პირობებში „სიმართლის დადგენის იმედი აქვს“.

გასამხედროებული ჯგუფის ”მონადირის” მეთაური ემზარ კვიციანი საქართველოდან 2006 წლის ივლისში გაიქცა მას შემდეგ, რაც მის მიერ მაშინდელი ხელისუფლებისთვის გამოცხადებული დაუმორჩილებლობის გამო ზემო კოდორის ხეობაში სამხედრო ოპერაცია ჩატარდა. ალყაში მოქცეულ კვიციანს სამართალდამცავებმა დერეფანი გაუკეთეს და გაუშვეს, ხოლო სამშობლოს ღალატის ბრალდებით მასზე ძებნა გამოაცხადეს. კვიციანი 2006 წლის 22 ივლისს დაუმორჩილებლობის გამოცხადების მიზეზად „მონადირის“ დაშლის გეგმებს ასახელებდა, თუმცა მოგვიანებით პოლიტიკური მოთხოვნებიც დააყენა.

კვიციანის წინააღმდეგ ჩატარებული ოპერაციის შემდეგ მაშინდელმა ხელისუფლებამ კოდორის ხეობაზე კონტროლი აღადგინა და აფხაზეთის ლეგიტიმური მთავრობის შტაბბინა ხეობაში გადაიტანა. ზემო კოდორის ხეობაზე კონტროლი თბილისმა 2008 წლის რუსეთ-საქართველოს ომის შედეგად დაკარგა.