საქართველოს ყოფილი პრეზიდენტის მიხეილ სააკაშვილის ბიძამ, თემურ ალასანიამ განაცხადა, რომ საქართველოს პრემიერ–მინისტრის ირაკლი ღარიბაშვილის წინააღმდეგ სასამართლოში სარჩელის შეტანას აპირებს, რადგანაც მთავრობის მეთაურმა ის „კგბ–ს პოლკოვნიკად“ მოიხსენია.

14 მარტს ნიუ–იორკიდან ტელეკომპანია „რუსთავი 2“–ის თოქშოუსთან ინტერვიუში თემურ ალასანიამ, რომელიც დიდი ხნის მანძილზე გაეროში მუშაობდა, მათ შორის განიარაღების კომისიაში, განაცხადა, რომ ის აპირებს სარჩელი შეიტანოს როგორც ნიუ–იორკის, ისე თბილისის სასამართლოებში, რათა თავისი "კეთილი სახელი" აღიდგინოს და „საჯარო ბოდიშის მოხდა“ მოითხოვოს ღარიბაშვილისგან.

გასულ კვირას პრემიერ–მინისტრმა ირაკლი ღარიბაშვილმა განაცხადა, რომ უკრაინის ამჟამინდელი ხელისუფლების „მძიმე შეცდომაა“, როცა ისეთი „მრჩეველი“ ჰყავს, როგორიც საქართველოს ყოფილი პრეზიდენტი მიხეილ სააკაშვილია; პრემიერ–მინისტრმა ასევე ახსენა თემურ ალასანია და განაცხადა: „მე დავინახე, რომ სააკაშვილი მარტო არ არის იქ ჩასული. როგორც მეუბნებიან  მას  ჩაყვანილი ჰყავს საკუთარი ბიძა [თემურ ალასანია], რომელსაც 'კარგი' წარსული აქვს, სხვათა შორის, საინტერესო წარსული აქვს იგივე რუსეთის სპეცსამსახურებთან ურთიერთობის კუთხით. ჩემი ინფორმაციით, ის კგბ-ს ყოფილი პოლკოვნიკია - ყოფილები, ხომ იცით, არ არსებობენ ამ სფეროში“.

თემურ ალასანიამ უთხრა „რუსთავი 2“–ს, რომ ზოგიერთ ქართულ მედია საშუალებაში მისი რეპუტაციის შელახვის მიზნით კამპანია მიმდინარეობს; მისი თქმით, ყურადღებას არ აქცევს ამას, მაგრამ იმის იგნორირება  არ შეუძლია, როდესაც ისეთი მაღალი რანგის პოლიტიკური ფიგურა, როგორიც საქართველოს პრემიერ–მინისტრია, ამგვარ ბრალდებას უყენებს.

მისი თქმით, იგი კერძო პირია და მიუხედავად ფართოდ გავრცელებულებული სპეკულაციებისა, რომ ის ძლიერ გავლენას ახდენდა სააკაშვილის პოლიტიკურ ცხოვრებაზე, მათ შორის მისი პრეზიდენტობის დროს, ალასანიამ განაცხადა, რომ „არასოდეს არავითარი რჩევები მე პრეზიდენტისთვის არ მიმიცია“.

„ეს რჩევები ჩემთვის, სხვათაშორის, არც უკითხია პრეზიდენტს“, – განაცხადა ალასანიამ, რომელმაც ასევე უარყო ბრალდებები იმასთან დაკავშირებით, რომ ის იარაღით უკანონო ვაჭრობაშია ჩართული და ამას „აბსურდი“ უწოდა.