ანატოლი ბიბილოვი, რომლის პარტიამ „ერთიანი ოსეთი“ 8 ივნისის არჩევნების შედეგად სეპარატისტული სამხრეთ ოსეთის პარლამენტში ადგილების უმრავლესობა მოიპოვა, ორშაბათს ახალი საკანონმდებლო ორგანოს თავმჯდომარედ აირჩიეს.  

ბიბილოვს, რომლის პარტიამაც 34–წევრიან პარლამენტში 20 ადგილი მოიპოვა, მხარი 30-მა დეპუტატმა დაუჭირა 3–ის წინააღმდეგ, იტყობინება საინფორმაციო სააგენტო „რესი“.

"ერთიანი ოსეთის" წინასაარჩევნო კამპანიის ერთ–ერთი წამყვანი თემა რუსეთში შესვლა იყო; პარტია ამ საკითხზე რეფერენდუმის გამართვისკენ მოუწოდებდა.

„ჩვენ არ ვამბობთ უარს ჩვენს ლოზუნგებზე,“ – განუცხადა ბიბილოვმა „იტარ–ტასს“ 23 ივნისს, „ეს საკითხი რეფერენდუმზე დადგება, მაგრამ ამ საკითხში სრულად ფორმირებული, კონსოლიდირებული, მოქმედებაში მოსული პარლამენტი უნდა ჩაერთოს“.

კიდევ სამი პარტია, რომელთაც ასევე მოიპოვეს მანდატები სეპარატისტული რეგიონის პარლამენტში, არიან: ხალხთა ერთობა, რომელსაც ჯავის რაიონის ხელმძღვანელი ვლადიმერ ქელეხსაევი ხელმძღვანელობს (6 ადგილი); ხალხის პარტია და ნიხასი (4 ადგილი თითოეულს).

ახალი საკანონმდებლო ორგანოს დამფუძნებელ სხდომაზე გამოსვლისას, სეპარატისტული რეგიონის ლიდერმა ლეონიდ თიბილოვმა პრიორიტეტებს შორის სამხრეთ ოსეთის „რუსულ სივრცეში შემდგომი ინტეგრაცია“ დაასახელა.

რუსეთის პრეზიდენტის ვლადიმერ პუტინის თანაშემწე ვლადისლავ სურკოვი, რომელიც სეპარატისტულ აფხაზეთთან და სამხრეთ ოსეთთან მოსკოვის ურთიერთობებს კურირებს, ცხინვალში ორდღიანი ვიზიტით 23 ივნისს ჩავიდა, იტყობინება „რესი“.

23 ივნისს სურკოვი, სხვა ოფიციალურ პირებთან ერთად, ასევე შეხვდა სეპარატისტული რეგიონის ახლად არჩეულ დეპუტატებს.