აშშ–ის სახელმწიფო მდივანმა ჯონ კერიმ საქართველოს, მოლდოვას და უკრაინას 27 ივნისს ევროკავშირთან ასოცირების შესახებ შეთანხმებების ხელმოწერა მიულოცა და განაცხადა, რომ აშშ მათ გვერდით იდგება „საკვანძო რეფორმების განხორციელების პროცესში“.

„დღეს ხელმოწერილი შეთანხმება მნიშვნელოვანი წინგადადგმული ნაბიჯია აღმოსავლეთ პარტნიორობის ამ ქვეყნების ევროკავშირთან მეტი ინტეგრაციისა და გამთლიანებული, თავისუფალი და მშვიდობიანი ევროპის გეგმის განხორციელების გზაზე“, – აღნიშნა აშშ–ის სახელმწიფო მდივანმა თავის განცხადებაში. 

„საქმე მხოლოდ ის როდია, რომ აღნიშნული შეთანხმებები ევროკავშირის აღმოსავლელ მეზობლებს ევროკავშირის ერთიან ბაზართან დააკავშირებს და მათ სავაჭრო და ფინანსურ დახმარებათა ახალ შესაძლებლობებს გაუხსნის. დღეს მოლდოვამ, საქართველომ და უკრაინამ გამოთქვეს მზადყოფნა, გაატარონ მნიშვნელოვანი ეკონომიკური და სამართლებრივი რეფორმები, რომელიც მათ გააძლიერებს და აქცევს უფრო ძლიერი დემოკრატიის ქვეყნებად“, – განაცხადა მან.

„გავაგრძელებთ საქართველოს, მოლდოვისა და უკრაინის ტერიტორიული მთლიანობის მხარდაჭერას. მხოლოდ ამ სუვერენულმა სახელმწიფოებმა და არავინ სხვამ უნდა გადაწყვიტოს, თუ რომელია მათი მოქალაქეების უსაფრთხოების, კეთილდღეობისა და უკეთესი მომავლის განმტკიცების საუკეთესო გზა. აპლოდისმენტები მათ იმ მძიმე შრომისა და მონდომებისათვის, რის შედეგადაც ისინი აქამდე მოვიდნენ. ჩვენ მათ გვერდით ვიდგებით საკვანძო რეფორმების განხორციელების პროცესში, რამაც ამ ქვეყნებში წელგამართული, სტაბილური და დემოკრატიული საზოგადოებები უნდა ააშენოს“, – განაცხადა ჯონ კერიმ. 

აშშ-ის სახელმწიფო დეპარტამენტში ევროპისა და ევრაზიის დახმარების კოორდინატორმა დანიელ როზენბლუმმა განაცხადა, რომ ევროპასა და ევრაზიაში 2015 წლისთვის აშშ-ის მიერ გასაწევი დახმარების მთლიანი მოცულობის ერთ-მესამედზე მეტი, რასაც დეპარტამენტი კონგრესისგან  ითხოვს, საქართველოსთვის, მოლდოვასთვის და უკრაინისთვის არის განკუთვნილი.

წარმომადგენელთა პალატის ევროპისა და ევრაზიის ქვეკომიტეტისთვის წარდგენილი მოხსენების თანახმად, სახელმწიფო დეპარტამენტმა ხელახლა გადახედა თავის დახმარების პროგრამებს ამ ქვეყნების მხარდასაჭერად მაშინ, როდესაც ისინი ასოცირების შესახებ შეთანხმებების განხორციელებისთვის ემზადებიან.

„საქართველოს და მოლდოვას მიმართ ჩვენი დახმარების დიდი ნაწილი მიზნად ისახავს რეფორმების მხარდაჭერას  დემოკრატიის, ეკონომიკის, კანონის უზენაესობის და სხვა სფეროებში, რომლებიც შეესაბამება აღმოსავლეთ პარტნიორობის მიზნებს“,  - ნათქვამია მოხსენებაში, „ბევრი პროგრამა, პირდაპირ თუ ირიბად, მხარს უჭერს ევროკავშირში ინტეგრაციას: სტანდარტების და შესაძლებლობების გაძლიერების ხელშეწყობას, რამაც საშუალება მისცა მოლდოვას 28 აპრილს ვიზების ლიბერალიზაცია მიეღო და იმავე მიზნისკენ საქართველოს ძალისხმევის მხარდაჭერას; საქართველოს და მოლდოვას ბიზნესების დახმარებას, რომ მათ  ევროკავშირის უსაფრთხოების სტანდარტები დაიცვან და გაზარდონ საერთაშორისო კონკურენტუნარიანობა; მაღალი დონის დიალოგების გამართვას ვაჭრობასა და ინვესტიციებზე; იმ გზების მოძიებას, რომ დახმარება მიიმართოს ორივე ქვეყნის ენერგო უსაფრთხოების შემდგომი გაძლიერებისკენ დივერსიფიცირების და უფრო მეტი ეფექტურობის გზით“. 

ნატოს გენერალური მდივანი ანდერს ფოგ რასმუსენი ასევე მიესალმა ასოცირების შესახებ შეთანხმებების ხელმოწერას და განაცხადა 27 ივნისს, რომ „ეს ხელს შეუწყობს ევროპაში თავისუფლების, სტაბილურობის და კეთილდღეობის გაძლიერებას“.

„ისინი [შეთანხმებები] დაეხმარება ახლო თანამშრომლობას კანონის უზენაესობის გაძლიერების, სასამართლო რეფორმების განხორციელების, კორუფციის წინააღმდეგ ბრძოლის, ფუნდამენტური უფლებების და თავისუფლებების პატივისცემის უზრუნველყოფის და დემოკრატიული ინსტიტუტების გაძლიერების მიმართულებით. ეს ის მიზნებია, რომელთაც ნატო იზიარებს და მხარს უჭერს ამ ქვეყნებთან და სხვა პარტნიორებთან საკუთარი პარტნიორობის გზით“, – განაცხადა რასმუსენმა.