ნატოს წევრ 12-ზე მეტ ქვეყანას შეაქვს საკუთარი წვლილი საქართველოსთან თანამშრომლობის არსებითი პაკეტის განხორციელებაში, რომელიც სხვა ზომებთან ერთად ასევე ითვალისწინებს საქართველოში ერთობლივი საწვრთნელი ცენტრის ჩამოყალიბებას, განაცხადა ნატოს გენერალურმა მდივანმა იენს სტოლტენბერგმა 5 თებერვალს.

„რამდენიმე მათგანმა მხარდაჭერა დღევანდელი შეხვედრის დროს აღუთქვა“, – განაცხადა მან ბრიუსელში თავდაცვის მინისტრების დონეზე ნატო–საქართველოს კომისიის სხდომის შემდეგ გამართულ პრესკონფერენციაზე.

„ისინი ნაწილობრივ შეიტანენ წვლილს პერსონალის უზრუნველყოფით და ნაწილობრივ შეიტანენ წვლილს ფინანსური დახმარებით. ამას გარდა, ამერიკის შეერთებული შტატები მთავარ როლს შეასრულებს საქართველოში ნატოს წვრთნებთან მიმართებაში“, – განაცხადა სტოლტენბერგმა.

„ეს საწვრთნელი ცენტრი მნიშვნელოვანია საქართველოსთვის, რადგანაც ისინი იქ საკუთარი შეიარაღებული ძალების წვრთნას გეგმავენ; ის მნიშვნელოვანია ნატოსთვის, რადგანაც იქ ჩვენი ძალების მომზადებას ვგეგმავთ; და მნიშვნელოვანია რამდენიმე პარტნიორი ქვეყნისთვის, რომლებიც ასევე შეძლებენ საკუთარი შეიარაღებული ძალების გაწვრთნას ახალ საწვრთნელ ცენტრში საქართველოში“, – განაცხადა მან და ასევე ხაზი გაუსვა, რომ ეს არის „საწვრთნელი ცენტრი და არა სამხედრო ბაზა“. 

არსებითი პაკეტი, რომელიც ნატოს ლიდერებმა 2014 წლის სექტემბერში უელსის სამიტზე დაამტკიცეს, ასევე ითვალისწინებს ნატოს მრჩეველთა გუნდის მივლენას საქართველოს თავდაცვის სამინისტროში. 

ნატო–საქართველოს კომისიის სხდომის შემდეგ გავრცელებულ ერთობლივ განცხადებაში ალიანსმა „საქართველოს დემოკრატიულ განვითარებაში დადებითი ტენდენციები აღნიშნა“. 
  
დოკუმენტი ასევე მოუწოდებს საქართველოს „განაგრძოს რეფორმების განხორციელება, მათ შორის დემოკრატიული ინსტიტუტების გაძლიერება, სასამართლო რეფორმის განხორციელება და  კანონის უზენაესობის სრული პატივისცემის უზრუნველყოფა“.

განცხადებაში ნატოს თავდაცვის მინისტრები „გმობენ რუსეთის მიერ საქართველოში გადადგმულ ნაბიჯებს, რაც ეწინააღდემეგება რუსეთის საერთაშორისო ვალდებულებებს“.

ნატოს გენერალურმა მდივანმა განაცხადა, რომ სეპარატისტულ აფხაზეთთან  რუსეთის ხელშეკრულება „მოკავშირეობის და სტრატეგიული პარტნიორობის“ შესახებ და დაგეგმილი ახალი ხელშეკრულება სეპარატისტულ სამხრეთ ოსეთთან „სამეზობლოში რუსეთის მადესტაბილიზებელი ქმედების შემაშფოთებელი ტენდენციის ნაწილია“.