თბილისის საქალაქო სასამართლომ წინასწარი შეცნობით, ტერორისტებისათვის და ტერორისტული ორგანიზაციისათვის მომსახურების გაწევისა და რესურსებით უზრუნველყოფის ბრალდებით დაკავებულ ანატოლი ბერძენიშვილს, 24 იანვარს გამართულ დახურულ სხდომაზე აღკვეთის ღონისძიების სახედ პატიმრობა შეუფარდა.

სასამართლოს მიერ გავრცელებულ განცხადებაში აღნიშნულია, რომ აღკვეთის ღონისძიება „ბრალდებულის მხრიდან დანაშაულებრივი საქმიანობის გაგრძელების, მიმალვისა და მტკიცებულებათა განადგურების საფრთხეთა გათვალისწინებით“ იქნა შერჩეული.

ანატოლი ბერძენიშვილი, რომელიც ბრალს არ აღიარებს, სახელმწიფო უსაფრთხოების სამსახურის კონტრტერორისტულმა დეპარტამენტმა 22 იანვარს დააკავა.

სუს-ის თანახმად, ანატოლი ბერძენიშვილი, მანამდე დაკავებულ ზურაბ გორნაკაშვილთან და ზურაბ იდოიძესთან ერთად, თურქეთში ჩავიდა „ისლამური სახელმწიფოს“ წევრის ახმედ ჩატაევის და მისი დაჯგუფების წევრების დასახმარებლად.

გამოძიება საქართველოს სისხლის სამართლის კოდექსის 331-ე პრიმა მუხლის მესამე ნაწილით მიმდინარეობს, რაც ტერორიზმის დაფინანსებას, ტერორისტული საქმიანობის სხვაგვარ მატერიალურ მხარდაჭერას ან რესურსებით უზრუნველყოფას გულისხმობს და სასჯელის ზომად 17-დან 20 წლამდე ვადით ან უვადო თავისუფლების აღკვეთას ითვალისწინებს.

ანატოლი ბერძენიშვილი მეექვსე პირია, რომელიც ახმედ ჩატაევის ჯგუფისათვის დახმარების ბრალდებით დააკავეს. ამავე ბრალდებით დაკავებულ კიდევ ოთხ პირს წინასწარი პატიმრობა - გასული წლის ბოლოს, ხოლო ერთს - 11 იანვარს შეეფარდა. ტერორისტული საქმიანობის ხელშეწყობაში კიდევ ერთი ეჭვმიტანილი, რომელიც გასული წლის ბოლოს პანკისის ხეობაში ჩატარებული სპეცოპერაციის დროს დაიჭრა, 10 იანვარს გარდაიცვალა.