კერძო ტელევიზიების წარმომადგენლებმა კიდევ ერთხელ გააკრიტიკეს ის ახალი რეგულაციები, რომელიც საზოგადოებრივ მაუწყებელს საბიუჯეტო სახსრების განკარგვაში მეტ თავისუფლებას და კომერციული რეკლამიდან დამატებითი შემოსვლების მიღების შესაძლებლობა ანიჭებს. მათი თქმით, სარეკლამო ბაზარზე საზოგადოებრივი მაუწყებლის შესვლით კერძო ტელევიზიები, განსაკუთრებით კი, რეგიონული მაუწყებლები დაზარალდებიან, რომელთა ფუნქციონირებაც დიდწილად რეკლამის განთავსებიდან მიღებულ შემოსავლებზეა დამოკიდებული. 

კერძო ტელეკომპანიებთან ერთად, საკანონმდებლო ცვლილებები საზოგადოებრივი მაუწყებლის აჭარის ტელევიზიის ხელმძღვანელმაც გააკრიტიკა. ნათია კაპანაძის თქმით, „ეს პროცესი ვერ მოიტანს ვერცერთ შემთხვევაში უკეთეს საზოგადოებრივ მაუწყებელს“. მისივე განცხადებით, საკანონმდებლო ცვლილებების პროცესი უნდა შეჩერდეს, ვიდრე საზოგადოებრივი არხების საჭიროებები „ფუნდამენტურად“ არ გადაიხედება. 

პარლამენტის თავმჯდომარემ შეხვედრაზე განაცხადა, რომ დეკემბერში საკანონმდებლო ცვლილებების განხილვისას მმართველ გუნდში აზრთა სხვადასხვაობა იყო, თუმცა გადაწყვეტილების მიღებისას „ჩვენ ვერ მოვისმინეთ საკმარისი არგუმენტები, რომელიც ამ კანონპროექტის მიზანშეუწონლობას დაასაბუთებდა“. მისივე თქმით, „მყარ არგუმენტებს“ არც პრეზიდენტის მიერ წარმოდგენილი მოტივირებული შენიშვნები შეიცავს. 

ამასთან ერთად, ირაკლი კობახიძემ განაცხადა, რომ ქართულ ოცნებას კანონპროექტის მიმართ „არავითარი პოლიტიკური ინტერესი“ არ აქვს და რომ „მთავარია, მივიღოთ ისეთი კანონპროექტი, რომელიც ერთი მხრივ, წაადგება საქართველოში საზოგადოებრივი მაუწყებლის განვითარების ინტერესს და მეორე მხრივ, არ დააზიანებს კერძო მაუწყებლების ინტერესებს“. 

პარლამენტის თავმჯდომარემ ასევე გამოთქვა მზადყოფნა, რომ სადავო კანონპროექტის შესახებ დამატებითი კონსულტაციები „უფრო ფართო ფორმატში“, საზოგადოებრივი მაუწყებლის წარმომადგენლებისა და დეპუტატების მონაწილეობით გაიმართოს. 

„მაუწყებლობის შესახებ“ კანონში ინიცირებული ცვლილებები პარლამენტმა 22 დეკემბერს მიიღო, პრეზიდენტმა კი 15 იანვარს კანონპროექტს ვეტო დაადო და მოტივირებული შენიშვნებით განსახილველად პარლამენტს დაუბრუნა. მედიაორგანიზაციების გარდა, საკანონმდებლო ცვლილებებს არ ეთანხმება მმართველი გუნდის ნაწილი, ასევე საპარლამენტო ოპოზიცია და სამოქალაქო სექტორი. არასამთავრობო ორგანიზაციებმა და მედიასაშუალებებმა პარლამენტს მიმართეს და პრეზიდენტის მოტივირებული შენიშვნების გაზიარებისკენ მოუწოდეს.