ოკუპირებული აფხაზეთის და ცხინვალის რეგიონის მთავრობებმა უარყვეს საქართველოს მთავრობის ახალი სამშვიდობო ინიციატივა, რომლის მიზანიც აფხაზეთის და ცხინვალის რეგიონის და დანარჩენი საქართველოს მაცხოვრებლებს შორის ეკონომიკური და ხალხთა შორის კავშირების გაფართოებაა.

4 აპრილს ინიციატივის კომენტირებისას, ოკუპირებული აფხაზეთის საგარეო საქმეთა მინისტრმა, დაურ კოვემ განაცხადა, რომ თბილისმა „ამოწურა აფხაზეთზე ზეწოლის რესურსები და გადაწყვიტა, რომ საერთაშორისო თანამეგობრობას ჩვენი სახელმწიფოს მიმართ მეგობრული განწყობა აჩვენოს და ზემოხსენებული ინიციატივების უკან თავის რეალურ განზრახვებს ოსტატურად მალავს“.

„მინდა მივმართო საქართველოს პოლიტიკურ ხელმძღვანელობას წინადადებით, რომ შეწყვიტოს ტყუილი საკუთარი ანგარებიანი პოლიტიკური ამბიციების სასარგებლოდ“, - განაცხადა კოვემ და დასძინა, რომ ერთადერთი გზა უკეთესი მომავლისკენ არის თბილისის მიერ „აფხაზეთის რესპუბლიკის დამოუკიდებლობის“ აღიარება და „სრულფასოვანი სახელმწიფოთაშორისი დიალოგის ჩამოყალიბება“.

ოკუპირებული ცხინვალის რეგიონის საგარეო საქმეთა სამინისტრომ ასევე უარყო საქართველოს მთავრობის ახალი ინიციატივა და მას „კიდევ ერთი პიარ ქმერდება“ და „მოუქნელი მცდელობა“ უწოდა, რათა საქართველო საერთაშორისო თანამეგობრობის თვალში წარმოჩინდეს როგორც „მშვიდობისმოყვარე სახელმწიფო კონსტრუქციული ხელმძღვანელობით“.

ოკუპირებული ცხინვალის ხელისუფლებამ თბილისი „სამხრეთ ოსეთის რესპუბლიკის მოქალაქეების ცდუნების“ მცდელობაში დაადანაშაულა და ინიციატივას „ილუზორული და არარეალისტური“ უწოდა. „ეს არ არის თბილისის პირველი მცდელობა, როდესაც ის სამხრეთ ოსეთთან თანამშრომლობის სურვილს გამოთქვამს. ამიტომ, არ ღირს ამგვარი განცხადებების სერიოზულად მიღება“, - ნათქვამია ოკუპირებული რეგიონის საგარეო უწყების განცხადებაში.

ცხინვალის ხელისუფლებამ ხაზგასმით აღნიშნა, რომ ერთდაერთი გზა უკეთესობისკენ იქნებოდა იურიდიულად სავალდებულო ძალის არგამოყენების შეთანხმების ხელმოწერა, „სამხრეთ ოსეთის რესპუბლიკის დამოუკიდებლობის და სამხრეთ ოსეთის ერის გენოციდის აღიარება“. „მხოლოდ ეს გადაწყვეტილებები შეუწყობს ხელს სახელმწიფოთაშორის დიალოგს და თანამშრომლობას სამხრეთ ოსეთს და საქართველოს შორის“, - ნათქვამია განცხადებაში.