23 ნოემბერს, 20:45 საქართველოს პრეზიდენტმა ედუარდ შევარდნაძემ თანამდებობა დატოვა. "თანამდებობიდან გადავდექი და ახლა ჩემი საქმე არ არის თუ ვინ იქნება ჩემი მემკვიდრე. მე საქართველოს დატოვებას არ ვაპირებ, მივდივარ სახლში" - განაცხადა ედუარდ შევარდნაძე კრწანისის რეზიდენციაში ბლოკ "ბურჯანაძე-დემოკრატების" ერთ-ერთ ლიდერის ზურაბ ჟავნიასა და "ერთიან ნაციონალურ მოძრაობის" ლიდერს მიხეილ სააკაშვილთან პირისპირ შეხვედრის შემდეგ.

"ედუარდ შევარდნაძემ ღირსეულად დაუსვა წერტილი იმ ვითარებას რაც ბოლო დღეებში საქართველოში ვითარდებოდა. ჩვენ პატივი უნდა ვცეთ  მის ამ გადაწყვეტილებას" - განაცხადა მიხეილ სააკაშვილმა შეხვედრის შემდეგ.

"ძალიან ამაღლებული შეხვედრა იყო. პრეზიდენტი მშვიდად საუბრობდა ჩვენთან შეხვედრის შემდეგ. მან ერთმნიშვნელოვნად აღნიშნა, რომ დარჩება თბილისში, სხვაგავრად ვერც წარმოუდგენია და მზად არის დახმარება აღმოუჩინოს თავის მემკვიდრეს" - განაცხადა ზურაბ ჟვანიამ.

საქართველოს პრეზიდენტის გადადგომის შესახებ განცხადება პარლამენტის შენობის წინ შეკრებილ მოსახლეობას პარლამენტის თავმჯდომარემ  ნინო ბურჯანაძემ აცნობა და ხალხს გამარჯვება მიულოცა.

"პრეზიდენტი გადადგა, გილოცავთ ამ მშვიდობიან გამარჯვებას", - განაცხადა ნინო ბურჯანაძემ.

არსებული კონსტიტუციის მიხედვით პრეზიდენტის მოვალეობას ნინო ბურჯანაძე შეასრულებს, 45 დღის ვადაში დაინიშნება საპარლამენტო და საპრეზიდნეტო არჩევნები.

ზურაბ ჟვანიას თქმით, ამჟამად უმთავრესია ქვეყანაში წესრიგის შენარჩუნება.