ბოლო ინფორმაციით, 18 აგვისტოს დაახლოებით 22 სთ–ზე დაწყებული სროლების შედეგად, რომელიც მთელი ღამის განმავლობაშ გაგრძელდა ცხინვალის რეგიონში კიდევ 7 ქართველი ჯარისკაცი დაიღუპა და დაახლოებით ამდენივე დაიჭრა.

სულ ქართველ ჯარისკაცებს შორის მსხვერპლის რაოდენობამ, ბოლო ერთი კვირის განმავლობაში, 16–ს მიაღწია.

როგორც ქართველი ოფიციალური პირები იტყობინებიან საბრძოლო მოქმედებების ზონიდა, რომელიც ძირითადად ქართულ სოფლებს ერედვსა და ვანათს მოიცავდა, მასიური დაბომბვების გამო დაჭრილების გამოყვანა ვერ ხერხდებოდა.

ქართული მხარის ცნობით სოფელ ვანათში დანგრეულია რამოდენიმე საცხოვრებელი სახლი.

გვიან ღამით სოფელ ერედვში უშიშროების მინისტრი ვანო მერაბიშვილი იმყოფებოდა, რომელმაც ჟურნალისტებს განუცხადა, რომ „მალე“ საქართველოს ხელისუფლება შექმნილ სიტუაციასთან დაკავშირებით განცხადებას გააკეთებს.

სამხრეთ ოსური მხარე, როგორც ყოველთვის, ამჯერადაც, პირველად ცეცხლის განხსნაში ქართულ მხარეს ადანაშაულებს. როგორც თვითგამოცხადებული რესპუბლიკის თავდაცვის მინისტრმა სააგენტო „იტარ–ტასს“ განუცხადა, ქართულმა მხარემ მძინე არტილერიისა და ნაღმტყორცნების მეშვეობით ოსურ სოფლ სარაბუკს შეუტია. ოსური მხარე მსხვერპლის ან დაშავებულების შესახებ არაფერს იუწყება.