ესტონეთში ვიზიტისას, 13 ოქტომბერს, საქართველოს პრეზიდენტმა მიხეილ სააკაშვილმა ქართველ ჟურნალისტებთან საუბრისას პირველი კომენტარები გააკეთა აფხაზეთში ბოლო დროს განვითარებულ მოვლენებთან დაკავშირებით. მან დაგმო 3 ოქტომბრის საპრეზიდენტო არჩევნები, თუმცა იქვე დასძინა, რომ აფხაზეთში "ანტიქართულ ძალებს“ არჩევნების საკუთარი სცენარით ჩატარება არ გამოუვიდათ.

"ჩვენ ყურადღებით ვაკვირდებით იმას, რაც ხდება. სრულიად ნათელია, რომ ეს არჩევნები არის სრულიად უკანონო, რადგან ჩატარდა ტერიტორიაზე, რომლის მოსახლეობის აბსოლუტური უმრავლესობა, და არა მარტო ქართველები, არიან გაძევებულნი. მაგრამ ერთი ძალიან საინტერესო რამ მოხდა. ყველაზე ანტიქართული ჯგუფის გეგმები, ამ არჩევნების ჩატარებასთან დაკავშირებით, ჩაიშალა. ყველაზე ექსტრემისტული, ყველაზე რადიკალური ძალები აშკარად აღმოჩნდნენ ძალიან სულელურ მდგომარეობაში. ამავე დროს მინდა ვთქვა, რომ ჩვენს მეგობარს იქ პრაქტიკულად ვერც ერთს ვერ ვხედავ, იმიტომ რომ მეგობრობა თუ უნდოთად, მაშინ ქართველები იქიდან არ უნდა გამოეყარათ. მაგრამ ჩვენ ყველა საშუალებას გამოვიყენებთ რათა მშვიდობიანი დიალოგით... ავუხსნათ ყველას, რომ ჩვენ გვაქვს მშვიდობიანი განზრახვები, ჩვენ გვინდა მშვიდობიანად კონფლიქტის დარეგულირება აფხაზი ხალხის ყველა უფლების დაცვით. ჩვენ გვინდა, რომ აფხაზი ხალხის მომავალი იყოს გარანტირებული, უზრუნველყოფილი და დაცული. ეს ძალიან მნიშვნელოვანია ჩვენთვის“, განაცხადა პრეზიდენტმა სააკაშვილმა.