ქართულ და აფხაზურ მხარეებს შორის მიღწეულია შეთანხმება საკოორდინაციო საბჭოს განახლების თაობაზე, ამის შესახებ 29 მარტს სოხუმში პრეზიდენტის ახლადდანიშნულმა მრჩეველმა კონფლიქტების მოგვარების საკითხებში ირაკლი ალასანიამ და თვითგამოცხადებული აფხაზეთის საგარეო საქმეთა მინისტრმა სერგეი შამბამ განაცხადეს.
29 მარტს ირაკლი ალასანია პრეზიდენტის მრჩევლის რანგში პირველი ვიზიტით ესტუმრა სოხუმს.
სერგეი შამბას განცხადებით, შეხვედრა "უჩვეულოდ ნაყოფიერი“ იყო ბოლო დროის განმავლობაში.
"ჩვენ აღვადგინეთ ძალიან მნიშვნელოვანი მექანიზმი - ეს არის საკოორდინაციო საბჭო, რომელიც ჩვენ ყოველთვის დაგვეხმარება მიმდინარე პრობლემების გადაჭრაში“, - იტყობინება "აფსნიპრესი" სერგეი შამბას სიტყვებზე დაყრდნობით.
ქართულ-აფხაზური საკოორდინაციო საბჭოს სხდომა ბოლოს 2001 წლის იანვარში ჩატარდა.
ირაკლი ალასანიას განცხადებით, საკოორდიანციო საბჭოს საქმიანობის განახლება იმ საკითხების წინ წაწევის შესაძლებელობას მისცემს მხარეებს, რომელთა ირგვლივ დაახლოებული პოზიციები არსებობს.
"ჩვენი მთავარი პრიორიტეტია მოლაპარაკებები აფხაზურ მხარესთან... ნდობის აღდგენის პროცესი და პირდაპირი მოლაპარაკებები მხარეებს შორის წინ წაიწევს მხოლოდ რეგულარული შეხვედრების და ეკონომიკური პროექტების განხორციელების გზით", - იტყობინება "აფსნიპრესი" ირაკლი ალასანიას სიტყვებზე დაყრდნობით.