სამხრეთ ოსეთის დე ფაქტო ხელისუფლების განცხადებით, კონფლიქტის ზონაში შუაღამისას და გამთენიისას მომხდარი ინტენსიური სროლების შედეგად თვრამეტი ადამიანი დაშავდა ოსური მხრიდან.
საქართველოს შინაგან საქმეთა სამინისტროს ინფორმაციით, 6 აგვისტოს საღამოდან ოსმა სეპარატისტებმა განახორციელეს სოფელ ერედვის, ფრისის, ავნევის, დვანის და ნულის დაბობმვა. ამავე ინფორმაციის თანახმად, დაჭრილია ორი ქართველი სამშვიდობო.
ამავდროულად, სამხრეთ ოსური მხარის ინფორმაციით, 18 ადამიანი, მათ შორის 88 წლის მამაკაცი და ოთხი ქალი, დაიჭრა მას შემდეგ ოსურ სოფლებს ხეთაგუროვს, დმენისს, სარაბუკს, უბიათს და ცხინვალის შემოგარენს ”მასიური ცეცხლი” გაუხსნეს. თავდაპირველად, სამხრეთ ოსურმა მხარემ 7 აგვისტოს დილით განაცხადა, რომ ექვსი ადამიანი დაშავდა სროლების შედეგად.
სამხრეთ ოსურმა მხარემ ასევე განაცხადა, რომ სროლები კონფლიქტის ზონაში 7 აგვისტოს დილის 10 საათზე განახლდა. მისი თქმით, ცეცხლი გაუხსნეს ზნაურის რაიონის ოსურ სოფელ უბიათს.