რუსეთის პრემიერ-მინისტრი ვლადიმერ პუტინი მართლაც მოიხსენიებდა მკაცრი ტონით პრეზიდენტ სააკაშვილის რეჟიმს, თუმცა ფრანგულ ჟურნალში გამოქვეყნებული ციტატები ინსინუაციებია, იტყობინება 14 ნოემბერს ”რია ნოვოსტი” რუსეთის მთავრობის პრესსამსახურის უფროსზე დიმიტრი პესკოვზე დაყრდნობით.

ფრანგული ყოველკვირეული ჟურნალი le Nouvel Observateur 12 ნოემბერს საგარეო პოლიტიკის საკითხებში საფრანგეთის პრეზიდენტის მრჩევლის ჟან-დევიდ ლევიტის სიტყვებზე დაყრდნობით წერდა, რომ 12 აგვისტოს მოსკოვში პრეზიდენტ სარკოზისა და პრემიერ მინისტრ ვლადიმერ პუტინს შორის შემდეგი შინაარსის დიალოგი გაიმართა: ”სააკაშვილს კვერცხებით ჩამოვკიდებ,” უთხრა პუტინმა სარკოზის, რაზეც სარკოზიმ გაკვირვებულმა უპასუხა:”ჩამოკიდებ?” ”რატომაც არა?” უპასუხა პუტინმა, ”ამერიკელებმა სადამ ჰუსეინი ხომ ჩამოკიდეს”. ”კი მაგრამ, შენც ხომ არ გინდა ბუშივით დაამთავრო?” - ჰკითხა სარკოზიმ. პუტინმა ამაზე გარკვეული პაუზის შემდეგ უპასუხა: ”ამაში მართალი ხარ”.

”ვლადიმერ პუტინმა მართლაც გამოიყენა საკმაოდ მკაცრი რიტორიკა სააკაშვილის რეჟიმის მისამართით. ამასთან, ასეთი ტიპის ”ციტატების” გამოქვეყნება, და ისიც საფრანგეთის პრეზიდენტის მრჩეველზე დაყრდნობით სულ ცოტა აბსოლუტურ გაუგებრობას იწვევს,”- აცხადებს პესკოვი და სტატიის ”პროვოკაციულ” ხასიათზე მიუთითებს.

le Nouvel Observateur ასევე წერდა, რომ პუტინს აგვისტოში თბილისის აღება და სააკაშვილის ჩამოგდება სურდა, თუმცა სარკოზიმ ეს გეგმა გადააფიქრებინა.

პუტინის პრესსამსახურის უფროსი განმარტავს, რომ საგარეო პოლიტიკის საკითხებში საბოლოო გადაწყვეტილებებს იღებს პრეზიდენტი მედვედევი, ხოლო ”ქვეყნის პრემიერ-მინისტრი თავის ფუნქციებს ასრულებს”.