ამერიკის შეერთებული შტატების და რუსეთის უთანხმოება საქართველოზე გრძელდება და ეს საკითხი კვლავ დადგება 24 ივნისს რუსეთის პრეზიდენტის დიმიტრი მედვედევის ვაშინგტონში ვიზიტის დროს, განაცხადა აშშ–ის პრეზიდენტის სპეციალურმა თანაშემწემ და ეროვნული უშიშროების საბჭოს რუსეთის და ევრაზიის საკითხებში უფროსმა დირექტორმა მაიკლ მაკფოლმა 22 ივნისს.

„ჩვენ მიგვაჩნია, რომ მათ [რუსების] მიერ აფხაზეთის და სამხრეთ ოსეთის ოკუპაცია არალეგიტიმურია... და ჩვენ ამ საკითხს აუცილებლად განვიხილავთ,“ – განუცხადა მან.

მან კიდევ ერთხელ გაიმეორა, რომ ვაშინგტონი კვლავაც მზად არის მხარი დაუჭიროს საქართველოს და ასევე აღნიშნა, რომ ამერიკის ევროპელი მოკავშირეების, მათ შორის საქართველოს, უსაფრთხოება გაიზარდა ობამას ადმინისტრაციის პოლიტიკის შედეგად, რომელიც რუსეთთან "გადატვირთვას“ ითვალისწინებს.

„ჩვენ საქართველოს მთავრობასთან ძლიერი ურთიერთობა გვაქვს. ჩვენ საქართველოსთან ძალიან ძლიერი დახმარების პროგრამა გვაქვს – ეს დახმარება ერთ სულ მოსახლეზე გათვლით ერთ–ერთი ყველაზე მაღალია მსოფლიოში... ჩვენ გრძელვადიანი მიზანი გვაქვს, რომ შევეცადოთ დავასრულოთ რუსეთის მიერ იმ ორი ტერიტორიის ოკუპაცია [აფხაზეთის და სამხრეთ ოსეთის]. ეს ჩვენი მიზანია,“ – განაცხადა მაკფოლმა.

„არის საქართველო და დანარჩენი ევროპა დღეს უფრო უსაფრთხო, ვიდრე მანამდე როდესაც ჩვენ [ობამას ადმინისტრაცია] აქ [თეთრ სახლში] მოვიდოდით? მიმაჩნია, რომ ჩვენი პასუხია ‘დიახ’,” – განაცხადა მან.

ეროვნული უსაფრთხოების საკითხებში თეთრი სახლის მრჩევლის მოადგილემ ბენ როუდსმა, რომელიც ობამას საგარეო პოლიტიკურ თემებზე ე.წ. სფიჩრაითერია, განაცხადა, რომ მიუხედავად იმისა, რომ ვაშინგტონს და მოსკოვს უთანხმოებები აქვთ რამოდენიმე საკითხზე, "ჩვენ შეგვიძლია ვითანამშრომლოთ ისეთ საკითხებზე სადაც ორმხრივი ინტერესი გვაქვს“.

„და რა თქმა უნდა, ამის მეორე მხარე ის არის, რომ  მიუხედავად იმისა, რომ ჩვენ ვთანამშრომლობთ ორმხრივი ინტერესის მქონე საკითხებზე, ჩვენ არც უთანხმოებები უნდა დავმალოთ,“ – განაცხადა როდესმა.