საერთაშორისო გამჭვირვალობის მიერ 26 ოქტომბერს გამოქვეყნებული 2010 წლის “კორუფციის აღქმის ინდექსის” შედეგების მიხედვით, საქართველო 178 ქვეყნიდან 68–ე ადგილზე მოხვდა; შარშანდელ ინდექსში საქართველოს 66–ე ადგილი ეკავა.

საქართველომ 3.8 ქულა მიიღო, მაშინ როცა გასულ წელს ეს მაჩვენებელი 4.1 ქულას შეადგენდა, ხოლო 2008 წელს – 3.9 ქულას.   

ქვეყნების შეფასება ხდება 0-დან (ყველაზე მეტად კორუმპირებული) 10-მდე (ყველაზე არაკორუმპირებული)  შკალაზე.

"2009 წელთან შედარებით საქართველოს ქულა მნიშვნელოვნად არ შემცირებულა,“ – განაცხადა საერთაშორისო გამჭირვალობა საქართველომ.

ორგანიზაციის თქმით, "სასამართლო სისტემაში რეფორმის გადაუდებელი აუცილებლობა, კერძო საკუთრების უფლების დაცვა, სახელმწიფო ხარჯების (პრეზიდენტის, თბილისის მერისა და მთავრობის სარეზერვო ფონდების) გაჭვირვალობის ნაკლებობა, ელიტური კორუფცია მაღალ ეშელონებში, გაურკვევლობა მედიის მფლობელობისა და დაფინანასების საკითხებში, ისევე როგორც სამოქალაქო საზოგადოების საჯარო პოლიტიკის წარმოებაში ჩართულობის დაბალი დონე – ეს იმ საკითხების ნუსხაა, რომლებიც საქართველოში ჯერ კიდევ პრობლემურად რჩება“.

"საქართველოს ინდექსი ცხადყოფს, რომ კორუფცია ჯერ კიდევ არ არის აღმოფხვრილი და კვლავ რჩება პრობლემად, რომელიც მოგვარებას საჭიროებს,“ – განაცხადა საერთაშორისო გამჭვირვალობა – საქართველოს აღმასრულებელი დირექტორის მოვალეობის შემსრულებელმა მატიას ჰუტერმა.

საქართველო რეიტინგში იტალიასა (67) და ბრაზილიას (69) შორის მოხვდა. საქართველო სხვა ყოფილ საბჭოთა რესპუბლიკებს უსწრებს, გარდა ბალტიისპირეთის ქვეყნებისა. საქართველო ასევე უსწრებს ევროკავშირის წევრ ქვეყნებს – რუმინეთს, ბულგარეთს და საბერძნეთს.