რუსეთის საგარეო საქმეთა სამინისტრომ განაცხადა, რომ 16 დეკემბერს ჟენევის დისკუსიების მე–14 რაუნდზე თბილისის "არაკონსტრუქციული“ პოზიციის გამო შეუძლებელი გახდა შემდგომი პროგრესის მიღწევა ძალის არგამოყენების საკითხზე.

"ამჯერად ცენტრალური საკითხი ამიერკავკასიაში ძალის არგამოყენების თემა იყო. საქართველოს პრეზიდენტის მიერ 23 ნოემბერს და ასევე აფხაზეთის და სამხრეთ ოსეთის მიერ 6 დეკემბერს გაკეთებული განცხადებები ძალის გამოყენებაზე უარის თქმის თაობაზე ახალ ატმოსფეროს ქმნიდა და რეალურად უწყობდა ხელს რეგიონში სტაბილურობის გაძლიერებას,“ – ნათქვამია რუსეთის საგარეო უწყების მიერ 17 დეკემბერს გამოქვეყნებულ განცხადებაში.

"სამივე სახელმწიფოს უსაფრთხოებისთვის ამ ყველაზე მნიშვნელოვანი მიმართულებით შემდგომ პროგრესს ხელი შეუშალა საქართგველოს წარმომადგებლების არაკონსტრუქციულმა პოზიციამ, რომელთაც, ფაქტიურად, იგნორირება გაუკეთეს მეზობლების განცხადებებს. კვლავ აშკარა გახდა თბილისის არამზაობა აფხაზეთთან და სამხრეთ ოსეთთან მეზობლური ურთიერთობები განავითაროს,“ – ნათქვამია განცხადებაში.

საქართველო დაჟინებით მოითხოვს რუსეთისთან, რომ ძალის არგამოყენების პირობა დადოს მას შემდეგ, რაც ანალოგიური ცალმხრივი დეკლარაცია პრეზიდენტმა სააკაშვილმა 23 ნოემბერს გააკეთა. თუმცა, რუსეთი აცხადებს, რომ ის კონფლიქტის მხარეს არ წარმოადგენს და დასძენს, რომ თბილისი, ერთის მხრივ, და ცხინვალი და სოხუმი, მეორეს მხრივ არიან კონფლიქტის მხარეები. ამის სანაცვლოდ, რუსეთი ცდილობს შუამავლად წარმოჩნდეს. ამ პოზიციას თბილისი "ცინიკურს“ უწოდებს.