საქართველოს ხელისუფლების განცხადებით, ვაჭრობის მსოფლიო ორგანიზაციაში (ვმო) რუსეთის გაწევრიანებასთან დაკავშირებით შვეიცარიაში დაგეგმილი ორმხრივი მოლაპარაკებების წინ თბილისის პოზიცია უცვლელია და დათმობებზე წასვლას არ აპირებს.

მოლაპარაკებებზე საქართველოს დელეგაციას პრემიერ–მინიტრის მთავარი მრჩეველი თამარ კოვზირიძე უხელმძღვანელებს, რომელიც მთავრობის პრესსამსახურის ცნობით, სავარაუდოდ უკვე ჩავიდოდა ბერნში აშშ–დან, სადაც პრემიერ–მინისტრ ნიკა გილაურს ახლდა თან. პრესსამსახურის ცნობით, მოლაპარაკებები 9 ან 10 მარტს გაიმართება.

პრეზიდენტის პრესსპიკერმა მანანა მანჯგალაძემ 8 მარტს განაცხადა, რომ მოლაპარაკებების განახლების წინ საქართველოს პოზიცია უცვლელია და ის მოითხოვს სეპარატისტულ რეგიონებში „არსებულ გამშვებ პუნქტებზე გამჭირვალობასა და ასევე ქართული საბაჟო სამსახურების დაშვების უზრუნველყოფას როკისა და ფსოუს გამშვებ პუნქტებზე“.

საპარლამენტო უმრავლესობის ლიდერმა პეტრე ცისკარიშვილმა 9 მარტს პლენარულ სხდომაზე გამოსვლისას განაცხადა, რომ საქართველო "არანაირ დათმობებზე არ უნდა წავიდეს“ იმ ქვეყანასთან მოლაპარაკებებში, რომელიც "არა მხოლოდ ოკუპანტია.., არამედ სანამ ეს 2008 წლის კონფლიქტი იქნებოდა, რუსეთი იყო ის ქვეყანა, რომელმაც ცალმხრივად შემოიღო ქართულ პროდუქციაზე ემბარგო“. 
 
მისი ინფორმაციით, შვეიცარიაში დაგეგმილი პირველი შეხვედრა დაეთმობა მოლაპარაკებების დღის წესრიგის შედგენას და არა შინაარსობრივ საკითხებს.

აღნიშნული განმარტებები ცისკარიშვილმა მას შემდეგ გააკეთა, რაც საპარლამენტო უმცირესობისა და ქრისტიან–დემოკრატების ლიდერმა, გიორგი თარგამაძემ მოუწოდა ხელისუფლებას, რომ მოლაპარაკებებზე არ წარსდგეს "არც ზედმეტად ხისტი და არც ზედმეტად ლმობიერი და დამთმობი პოზიციით“.

მისი შეფასებით, "არარეალისტურია“ საქართველოს ხელისუფლების პოზიცია ქართველი მებაჟეების ფსოუსა და როკის გვირაბის გამშვებ პუნქტებზე განთავსებასთან დაკავშირებით. თარგამაძემ ამ მოთხოვნის სანაცვლოდ მოლდოვას პრეცედენტის გამოყენებისაკენ მოუწოდა, სადაც მოლდოვა–უკრაინის საზღვარზე, მათ შორის დნესტრისპირეთის კონფლიქტური რეგიონის მონაკვეთზე ევროკავშირის მონიტორინგის მისია ფუნქციონირებს და საბაჟო და სასაზღვრო პროცედურებს აკვირდება.