Civil.ge-ს შესახებ
Eng | ქარ | Рус
ბოლო განახლება: 11:10 - 28 აპრ.'18
RSS
Mobile
Twitter
Facebook
სადამკვირვებლო ორგანიზაციები საარჩევნო შეთანხმებას აკრიტიკებენ
სივილ ჯორჯია, თბილისი / 1 ივლ.'11 / 12:28

სამი ადგილობრივი სადამკვირვებლო ორგანიზაცია აცხადებს, რომ მმართველი პარტიის მიერ წარმოდგენილი შეთანხმება, რომელსაც რამდენიმე ოპოზიციური პარტია დაეთანხმა, ვერ უზრუნველყოფს სამართლიანი და თავისუფალი არჩევნების ჩატარებას და "საარჩევნო გარემოში არსებული ხარვეზების აღმოფხვრას".

"საქართველოს ახალგაზრდა იურისტთა ასოციაცია“, "საერთაშორისო გამჭირვალობა – საქართველო“ და "სამართლიანი არჩევნებისა და დემოკრატიის საერთაშორისო საზოგადოება“ 30 ივნისს გამოქვეყნებულ ერთობლივ მოსაზრებებში აცხადებენ, რომ მიუხედავად იმისა, რომ წარმოდგენილი ცვლილებები გარკვეულ პოზიტიურ ინიციატივებს მოიცავს, ისინი "არასაკმარისია“.

საარჩევნო სისტემასთან დაკავშირებით, სამი ორგანიზაცია აცხადებს, რომ პარლამენტის წევრთა რაოდენობის 150–დან 190–მდე გაზრდის ინიციატივა რეფერენდუმზე გასატანი საკითხია და ამის გარეშე ნებისმიერი საკონსტიტუციო ცვლილება იქნება რეფერენდუმის შესახებ ორგანული კანონის დარღვევა, რომელიც ამბობს, რომ რეფერენდუმით მიღებული გადაწყვეტილება, ისევ ამ გზით შეიძლება შეიცვალოს.

“გაუგებარია რატომ ხდება შეთანხმებაში მონაწილე პარტიების მიერ წინასწარ იმის დაპირება, რაც საქართველოს მოსახლეობის მიერ რეფერენდუმის გზით უშუალოდ გადასაწყვეტ საკითხს წარმოადგენს“, – ნათქვამია განცხადებაში.

თუმცა შეთანხმების ხელმომწერი პარტიები აცხადებენ, რომ 2003 წლის რეფერენდუმი, რომელზეც პარლამენტის რიცხოვნობა 150 წევრით განისაზღვრა, არაკონსტიტუციური იყო და შესაბამისად ახალი გადაწყვეტილების მიღება არ საჭიროებს ახალ რეფერენდუმს.

ამასთან, სადამკვირვებლო ორგანიზაციები ხაზგასმით აღნიშნავენ, რომ საარჩევნო სისტემაზე წარმოდგენილი წინადადებები ვერ აგვარებს იმ პრობლემას, რომელიც დაკავშირებულია პარტიის მიერ მიღებული ხმებისა და მის მიერ პარლამენტში მოპოვებული მანდატების ერთმანეთთან პროპორციულობასთან.

სამი ორგანიზაცია, აქვე, მიესალმება ამომრჩეველთა სიებზე მომუშავე ჯგუფის შექმნის იდეას, რომელიც არჩევნებამდე მნიშვნელოვანი დროით ადრე დაიწყებს საქმიანობას, თუმცა აღნიშნავს, რომ ეს კომისია "ვერ უზრუნველყოფს ამომრჩეველთა სიებთან დაკავშირებული პრობლემების საბოლოოდ აღმოფხვრას“.

“მიგვაჩნია, რომ პირველ რიგში უნდა განისაზღვროს ამომრჩეველთა სიის შედგენაზე პასუხისმგებელი ერთი უწყება და უზრუნველყოფილი იყოს ამომრჩეველთა სიის ფორმირებაში მონაწილე მონაცემთა ბაზების ერთმანეთთან თავსებადობა“, – ნათქვამია განცხადებაში.

სადამკვირვებლო ორგანიზაციები ასევე აცხადებენ, რომ ადმინისტრაციული რესურსის გამოყენების პრევენციისთვის, შეთანხმებით გათვალისწინებული, უწყებათაშორისი საკოორდინაციო საბჭოს შექმნა "არასაკმარისი მექანიზმია“, ხოლო მედია მონიტორინგის მექანიზმი, რასაც მოქმედი საარჩევნო კოდექსიც ითვალისწინებს, არ წარმოადგენს ისეთ "ნოვაციას", რომელიც "ფუნდამენტურად შეცვლიდა მედიის მხრიდან საარჩევნო თემატიკის გაშუქებასთან დაკავშირებულ პრობლემებს“.

სამი ორგანიზაცია აცხადებს, რომ არ ეთანხმება საარჩევნო შემოწირულობების გაორმაგების ინიციატივას ფიზიკური პირებისათვის 60 ათას ლარამდე, ხოლო იურიდიული პირებისათვის 200 ათას ლარამდე. დამკვირვებლები მოუწოდებენ დამოუკიდებელი ორგანოს შექმნისკენ, რომელსაც პარტიების დაფინანსებისა და მათი წინასაარჩევნო კამპანიის მონიტორინგი დაევალება.

არასამთავრობო ორგანიზაციები მიესალმებიან საარჩევნო დავების განხილვის დადგენილი ვადების 2–დან 4 დღემდე გაზრდის ინიციატივას, თუმცა აცხადებენ, რომ აღნიშნული ცვლილება არ არის საკმარისი დავებთან დაკავშირებული პრობლემების მოსაგვარებლად, რადგანაც კანონმდებლობაში არსებული ნორმები "ბუნდოვანია და სხვადასხვაგვარი ინტერპრეტაციის საშუალებას იძლევა“.

"შემოთავაზებული დოკუმენტი სისტემურად არ ეხმიანება ისეთ მნიშვნელოვან საკითხებს, როგორიცაა საარჩევნო ადმინისტრაციების დაკომპლექტება, ადმინისტრაციული რესურსების გამოყენების შეზღუდვა, პოლიტიკური პარტიების დაფინანსების სისტემის დახვეწა, ფინანსური მონიტორინგის მექანიზმების შექმნა და ა.შ.“, – ნათქვამია განცხადებაში.

სამი ორგანიზაცია აცხადებს, რომ მზადაა ჩაერთოს საარჩევნო გარემოს "რეალურად გაუმჯობესებისათვის საჭირო საკანონმდებლო ცვლილებების შემუშავებაში", რისთვისაც "აუცილებელია დისკუსიის გაგრძელება“.

“დათქმა იმის თაობაზე, რომ წარდგენილი წინადადებების გარდა სხვა საკითხებზე შეთანხმება აღარ მოხდება, მიუღებელია“, – ნათქვამია განცხადებაში.

მმართველმა პარტიამ განაცხადა, რომ დოკუმენტში ასახული პუნქტები ის მაქსიმუმია, რაზეც შეთანხმება შესაძლებელი იყო და ახლა უკვე მათი კანონმდებლობაში ასახვის მომდევნო ეტაპი იწყება.

უახლესი ამბები
28 აპრ.'18 11:10
ვანის და ხონის საარჩევნო ოლქში შუალედური საპარლამენტო არჩევნები მიმდინარეობს
ერთმანდატიან საარჩევნო ოლქში არჩევნებში ხუთი პარტიის და ერთი საინიციატივო ჯგუფის წარმომადგენელები მონაწილეობენ.
27 აპრ.'18 18:49
ქართველი პოლიტიკოსები ბიძინა ივანიშვილის პარტიაში დაბრუნებას აფასებენ
ბიძინა ივანიშვილს ქართული ოცნების თავმჯდომარედ პარტიის ყრილობაზე აირჩევენ, რომელიც უახლოეს პერიოდში შედგება.
27 აპრ.'18 18:09
აშშ-ის სახელმწიფო მდივნის თანაშემწე საქართველოს ესტუმრება
ვეს მიტჩელი ხელისუფლების წარმომადგენლებს შეხვდება და ნატო-საქართველოს სახალხო დიპლომატიის ფორუმზე გამოვა სიტყვით.
26 აპრ.'18 19:07
სტოლტენბერგი: საქართველო ნატოს ‘ძალიან ახლო’ პარტნიორია
ნატოს გენერალური მდივნის თქმით, საგარეო საქმეთა მინისტრების შეხვედრა ქვეყნის პროგრესს აღიარებს.
26 აპრ.'18 16:47
ყოფილი პრემიერ-მინისტრი ბიძინა ივანიშვილი ქართული ოცნების თავმჯდომარე გახდება
პრემიერ კვირიკაშვილის თქმით, ივანიშვილს შესწევს ძალა გააძლიეროს პოლიტიკური პარტია და მას „ახალი დინამიკა“ შესძინოს.
25 აპრ.'18 18:33
ხაჯიმბამ მთავრობის ახალი ხელმძღვანელი დანიშნა
გენადი გაგულიას ორჯერ ეკავა ოკუპირებული რეგიონის პრემიერ-მინისტრის თანამდებობა.
25 აპრ.'18 15:17
საქართველოს რეიტინგი პრესის თავისუფლების ინდექსში გაუმჯობესდა
საქართველოს პოსტ-საბჭოთა ქვეყნებიდან, ბალტიისპირეთის ქვეყნების გარდა, არცერთი ქვეყანა არ უსწრებს.
25 აპრ.'18 14:18
გახარია ლიტვაში საგარეო და შინაგან საქმეთა მინისტრებს შეხვდა
საქართველოს და ლიტვის ოფიციალურმა პირებმა ევროკავშირთან უვიზო რეჟიმზე და სამართალდამცავ სტრუქტურებს შორის თანამშრომლობაზე ისაუბრეს.
24 აპრ.'18 17:29
განსხვავებული რეაქციები საქართველოში სომხეთის პროტესტზე
მმართველი პარტიის დეპუტატმა განაცხადა გუშინ, რომ „მთავარია მშვიდი ვითარება და სტაბილურობა ჩვენს სამეზობლოში“.
24 აპრ.'18 12:42
ცხინვალის ლიდერი იალტის ფორუმს დაესწრო და სირიის, იტალიის და სერბეთის დელეგაციებს შეხვდა
ანატოლი ბიბილოვმა 19-21 აპრილს იალტის საერთაშორისო ეკონომიკურ ფორუმში მიიღო მონაწილეობა.

სივილ ჯორჯიას შესახებ
Civil.Ge © 2001-2018, ახალი ამბები საქართველოდან
რეგისტრაციის ადგილი: დოლიძის ქ. 2, IV სართული.
36