თერთმეტი პოლიტიკური პარტია უერთდება სამოქალაქო კამპანიის „ეს შენ გეხება“ მოწოდებებს ხელისუფლების მიმართ, რომ დაინერგოს ე.წ. must carry-ის და must offer-ის პრინციპები, რათა დღის წესრიგიდან მოიხსნას საარჩევნო პერიოდში მოსახლეობისთვის ინფორმაციაზე თანაბარი ხელმისაწვდომობის პრობლემა.

„ვიზიარებთ ქართული არასამთავრობო და მედია ორგანიზაციების მიერ პარლამენტში შეტანილ საკანონმდებლო წინადადებას ქართულ კანონმდებლობაში ე.წ. must carry-ის და must offer-ის პრინციპების დანერგვის თაობაზე. როგორც საერთაშორისო პრაქტიკა ადასტურებს, პარლამენტის მხრიდან აღნიშნული ინიციატივის გაზიარება მნიშვნელოვნად შეუწყობს ხელს მოსახლეობისთვის სხვადასხვა ტელეარხებზე და მრავალფეროვან ინფორმაციაზე ხელმისაწვდომობას“, – ნათქვამია განცხადებაში, რომელიც 13 ივნისს გამოქვეყნდა.

17 კვალიფიციური სუბიექტიდან განცხადებას ხელს აწერს 11 საბიუჯეტო დაფინანსების მქონე პოლიტიკური პარტია, რომელთა შორისაა პარლამენტში წარმოდგენილი ქრისტიან-დემოკრატიული მოძრაობა, ქართული დასი, ევროპელი დემოკრატები (ყოფილი ჩვენ თვითონ); კოალიცია „ქართული ოცნებიდან“:  რესპუბლიკელები, კონსერვატორები, ჩვენი საქართველო - თავისუფალი დემოკრატები, ეროვნული ფორუმი, მრეწველები და ხალხის პარტია; ასევე ახალი მემარჯვენეები და საქართველოს გზა.

კამპანიის „ეს შენ გეხება“ არასამთავრობო და მედია ორგანიზაციებმა პარლამენტს მაისის დასაწყისში წარუდგინეს საარჩევნო კანონმდებლობაში შესატანი ცვლილებების კომპლექსური პაკეტი, რომლის ნაწილია ე.წ. Must carry-ის და must offer-ის პრინციპები, რომლებიც, შემოღების შემთხვევაში, დაავალდებულებს საკაბელო ქსელებს, რომ საქართველოში ლიცენზირებული მაუწყებლების სავალდებულო ტრანზიტი განახორციელონ, საინფორმაციო არხების შერჩევითი ამოღების გარეშე და მეორე მხრივ, მაუწყებლები ვალდებულნი გახდებიან, რომ საკაბელო ოპერატორებს რეტრანსლირების უფლება მისცენ. ინიციატივის ავტორებმა მას შემდეგ, რაც ამ საკითხთან დაკავშირებით აშშ–ის სახელმწიფო მდივანს ჰილარი კლინტონს საქართველოში ვიზიტის წინ საგანგებო მიმართვა გაუგზავნეს, ასევე მოუწოდეს პარლამენტს ამ პრინციპების დაკანონებისკენ.

თუმცა მმართველი პარტია უარს აცხადებს ამ რეგულაციის შემოღებაზე იმ მოტივით, რომ ეს კერძო ბიზნესში ჩარევა იქნება.