Civil.ge-ს შესახებ
Eng | ქარ | Рус
ბოლო განახლება: 11:10 - 28 აპრ.'18
RSS
Mobile
Twitter
Facebook
საზოგადოებრივ მაუწყებელს ფინანსთა სამინისტრო ამოწმებს
სივილ ჯორჯია, თბილისი / 7 ნოე.'12 / 19:11

ფინანსთა მინისტრმა ნოდარ ხადურმა მას შემდეგ, რაც საზოგადოებრივმა მაუწყებლის ხელმძღვანელობამ გაასაჯაროვა, რომ შემოსავლების სამსახურმა ორგანიზაციის შემოწმება დაიწყო, განაცხადა, რომ ეს გადაწყვეტილება განაპირობა ბიუჯეტის წინაშე 3.8 მლნ ლარის ოდენობით დაგროვილმა საგადასახადო დავალიანებამ.

„2010 წლის ოქტომბრიდან დღემდე საზოგადოებრივმა მაუწყებელმა დააგროვა 3.8 მლნ ლარის საგადასახადო დავალიანება, რაც არის კანონდარღვევა და რაც გვაძლევს სრულ საფუძველს, რომ განვახორციელოთ ჩვენი ექსკლუზიური უფლება და შევამოწმოთ რამ გამოიწვია გადასახადის გადამხდელის მიერ ასეთი ოდენობის გადასახადის დამალვა“, – განაცხადა ხადურმა 7 ნოემბერს გამართულ პრესკონფერენციაზე.

ცოტა ხნით ადრე პრესკონფერენცია საზოგადოებრივი მაუწყებლის დირექტორმა გია ჭანტურიამ მოიწვია, სადაც განასაჯაროა საზოგადოებრივ მაუწყებელში საგადასახადო ორგანოების მიერ რევიზიის დაწყების ფაქტი.

„ეს ყველაფერი კანონის ფარგლებშია, ჩვენ არ ვამბობთ, რომ აქ რამე ირღვევა, თუმცა ძალიან ბევრი კითხვა არის“, – განაცხადა ჭანტურიამ. 
 
ფინანსური შემოწმება 6 ნოემბრიდან დაიწყო ფინანსთა მინისტრის ნოდარ ხადურის ბრძანების საფუძველზე.

ჭანტურიას თქმით, ეს უჩვეულო ფაქტია იმის გამო, რომ საზოგადოებრივ მაუწყებლის შემოწმების პრეროგატივა აქვს აუდიტის სამსახურს და 90–იან წლების შემდეგ ეს ორგანიზაცია საგადასახადო ორგანოებს არ შეუმოწმებია. მისი თქმით, კითხვები ჩნდება იმის გამოც, რომ თავად ფინანსთა სამინისტროს ამ საკითხზე საზოგადოების ინფორმირება არ მოუხდენია. „მათ მთხოვეს, რომ არ განმესაჯაროებინა ინფორმაცია რევიზიის შესახებ“, – განაცხადა ჭანტურიამ.

მოგვიანებით ნოდარ ხადურმა დაადასტურა, რომ შემოსავლების სამსახურმა დაგროვილი დავალიანების საფუძველზე დაიწყო საზოგადოებრივი მაუწყებლის შემოწმება, რაც მისი თქმით, კანონით დადგენილ ვადაში –  1 თვეში დასრულდება და საზოგადოება იქნება ინფორმირებული მისი შედეგების შესახებ.

„კარგად გვესმის, რომ საქმე ეხება საზოგადოებრივ მაუწყებელს, საქმე ეხება მედიას, ამიტომ ჩვენ თანამშრომლებს, ოფიცრებს მიცემული აქვთ დავალება, რომ ხელი არ შეუშალონ მაუწყებლის ნორმალურ ფუნქციონირებას, იყვნენ ძალიან კეთილგანწყობილი“, – განაცხადა ფინანსთა მინისტრმა.

„დღეიდან საქართველოში არ იარსებებს არცერთი პრივილეგირებული გადასახადის გადამხდელი, რომელსაც შემოსავლების სამსახური არ შეამოწმებს“, – აღნიშნა მან. 

ფინანსთა მინისტრმა ასევე განაცხადა, რომ ყოფილმა მთავრობამ „ვერ მოასწრო“ საზოგადობრივი მაუწყებლისთვის ამ დავალიანების ჩამოჭრა, განსხვავებით სხვა რამოდენიმე ტელეკომპანიისაგან.

მისი ინფორმაციით, ყოფილი პრემიერ–მინისტრის ვანო მერაბიშვილის გადაწყვეტილებით „რუსთავი 2“–ს, „იმედს“, „რეალ ტვ“–ის, სახელმწიფო ბიუჯეტის წინაშე ჯამში, დაახლოებით, 20 მლნ ლარის საგადასახადო დავალიანება ჩამოეჭრათ.

ამ ინიციატივით ყოფილი მთავრობის ფინანსთა მინისტრი 15 ოქტომბერს გამოვიდა, ვიდრე ტელეკომპანია "იმედი" მის მფლობელს დაუბრუნდებოდა. 2010 წლის ივლისში განხორციელებული ანალოგიური ინიციატივის ფარგლებში ნაციონალურ და რეგიონალურ მაუწყებლებს, დაახლოებით, 36 მლნ ლარის საგადასახადო დავალიანება სრულად ჩამოეწერათ, მათ შორის, საზოგადოებრივ მაუწყებელს, დაახლოებით, 9 მლნ ლარის დავალიანება ჩამოეჭრა.

საზოგადოებრივი მაუწყებელი, რომელიც ბიუჯეტიდან ფინანსდება, მიმდინარე წელს 49.6 მლნ ლარის დაფინანსებას იღებს. ახალი მთავრობის მიერ წარდგენილი ბიუჯეტის პროექტის თანახმად, საზოგადოებრივი მაუწყებლისთვის 2013 წელს 31.8 მლნ ლარის დაფინანსებაა გათვალისწინებული. ეს კლება შესაძლოა გამოწვეული იყოს მისი რუსულენოვანი არხის ფუნქციონირების გაგრძელების ირგვლივ არსებული გაუგებრობით.

უახლესი ამბები
28 აპრ.'18 11:10
ვანის და ხონის საარჩევნო ოლქში შუალედური საპარლამენტო არჩევნები მიმდინარეობს
ერთმანდატიან საარჩევნო ოლქში არჩევნებში ხუთი პარტიის და ერთი საინიციატივო ჯგუფის წარმომადგენელები მონაწილეობენ.
27 აპრ.'18 18:49
ქართველი პოლიტიკოსები ბიძინა ივანიშვილის პარტიაში დაბრუნებას აფასებენ
ბიძინა ივანიშვილს ქართული ოცნების თავმჯდომარედ პარტიის ყრილობაზე აირჩევენ, რომელიც უახლოეს პერიოდში შედგება.
27 აპრ.'18 18:09
აშშ-ის სახელმწიფო მდივნის თანაშემწე საქართველოს ესტუმრება
ვეს მიტჩელი ხელისუფლების წარმომადგენლებს შეხვდება და ნატო-საქართველოს სახალხო დიპლომატიის ფორუმზე გამოვა სიტყვით.
26 აპრ.'18 19:07
სტოლტენბერგი: საქართველო ნატოს ‘ძალიან ახლო’ პარტნიორია
ნატოს გენერალური მდივნის თქმით, საგარეო საქმეთა მინისტრების შეხვედრა ქვეყნის პროგრესს აღიარებს.
26 აპრ.'18 16:47
ყოფილი პრემიერ-მინისტრი ბიძინა ივანიშვილი ქართული ოცნების თავმჯდომარე გახდება
პრემიერ კვირიკაშვილის თქმით, ივანიშვილს შესწევს ძალა გააძლიეროს პოლიტიკური პარტია და მას „ახალი დინამიკა“ შესძინოს.
25 აპრ.'18 18:33
ხაჯიმბამ მთავრობის ახალი ხელმძღვანელი დანიშნა
გენადი გაგულიას ორჯერ ეკავა ოკუპირებული რეგიონის პრემიერ-მინისტრის თანამდებობა.
25 აპრ.'18 15:17
საქართველოს რეიტინგი პრესის თავისუფლების ინდექსში გაუმჯობესდა
საქართველოს პოსტ-საბჭოთა ქვეყნებიდან, ბალტიისპირეთის ქვეყნების გარდა, არცერთი ქვეყანა არ უსწრებს.
25 აპრ.'18 14:18
გახარია ლიტვაში საგარეო და შინაგან საქმეთა მინისტრებს შეხვდა
საქართველოს და ლიტვის ოფიციალურმა პირებმა ევროკავშირთან უვიზო რეჟიმზე და სამართალდამცავ სტრუქტურებს შორის თანამშრომლობაზე ისაუბრეს.
24 აპრ.'18 17:29
განსხვავებული რეაქციები საქართველოში სომხეთის პროტესტზე
მმართველი პარტიის დეპუტატმა განაცხადა გუშინ, რომ „მთავარია მშვიდი ვითარება და სტაბილურობა ჩვენს სამეზობლოში“.
24 აპრ.'18 12:42
ცხინვალის ლიდერი იალტის ფორუმს დაესწრო და სირიის, იტალიის და სერბეთის დელეგაციებს შეხვდა
ანატოლი ბიბილოვმა 19-21 აპრილს იალტის საერთაშორისო ეკონომიკურ ფორუმში მიიღო მონაწილეობა.

სივილ ჯორჯიას შესახებ
Civil.Ge © 2001-2020, ახალი ამბები საქართველოდან
რეგისტრაციის ადგილი: დოლიძის ქ. 2, IV სართული.
31