საზოგადოებრივი მაუწყებლის გენერალური დირექტორის ვაკანტურ თანამდებობაზე გამოცხადებულ ღია კონკურსში მონაწილეობის მსურველი 143 კანდიდატიდან მეორე ტურში 5 კანდიდატი გადავიდა.

მეორე ტურში გადასული კანდიდატების ვინაობა სამეურვეო საბჭომ 20 დეკემბრის 18 საათზე განაცხადების მიღების ვადის ამოწურვიდან ცოტა ხანში გამოაქვეყნა.

კანდიდატებს შორის არიან: გიორგი ბარათაშვილი, საზოგადოებრივი მაუწყებლის ტექნიკური დეპარტამენტის ხელმძღვანელი, რომელიც წლების წინ ასევე მუშაობდა ტელეკომპანიებში „იბერია“ და „მეცხრე არხი“; თინათინ რუხაძე შპს „ივენთ მასტერსის“ მმართველი პარტნიორი; ნათია აბრამია, ბი-ბი-სის ჟურნალისტი, რომელიც ადრე ასევე მუშაობდა „რუსთავი 2“-სა და „იბერიაში“; მეგი თავდუმაძე, რომელიც ბოლო პერიოდში გაეროს განვითარების პროგრამის პროექტის მენეჯერად მუშაობდა ნიუ-იორკში; ნიკოლოზ მახარაშვილი, შავი ზღვის უნივერსიტეტის ბიზნესის ფაკულტეტის ხარისხის მენეჯერი.

მეორე ტურში გასული კანდიდატები გასაუბრებას გაივლიან, რის შემდეგაც სამეურვეო საბჭო ახალ დირექტორს 6 წლის ვადით აირჩევს.

საზოგადოებრივი მაუწყებლის გენერალური დირექტორის თანამდებობა ვაკანტური მას შემდეგ გახდა, რაც გიორგი ჭანტურიამ 14 დეკემბერს თანამდებობის დატოვების შესახებ განაცხადა. იმავე დღეს, საზოგადოებრივი მაუწყებლის სამეურვეო საბჭომ გამოაცხადა შესარჩევი კონკურსი, რომელიც ერთი თვის ვადაში ახალი დირექტორის არჩევით უნდა დასრულდეს.