თბილისი იმედოვნებს, რომ ორ ქვეყანას შორის უსაფრთხოების საკითხებში მიმდინარე თანამშრომლობის ფარგლებში აშშ საქართველოს თავდაცვითი იარაღით დახმარებას გაუწევს, განაცხადა პრეზიდენტმა სააკაშვილმა Newsweek–თან ინტერვიუში.

“საქართველოს თავდაცვისუუნაროდ დატოვება სიტუაციას არ გააუმჯობესებს,“– ნათქვამია ინტერვიუში სააკაშვილის სიტყვებზე დაყრდნობით, "საქართველოს არ შეუძლია რუსეთზე თავდასხმა, მაშინ როცა რუსეთისთვის საქართველოს თავდაცვისუუნარობა დიდი ცდუნებაა, რომ სამხედრო გზით შეცვალოს ჩვენი მთავრობა“.

“ყოველ ჯერზე, როცა [რუსეთის პრემიერ–მინისტრმა ვლადიმერ] პუტინმა საპრეზიდენტო არჩევნებში მიიღო მონაწილეობა, ის ამის წინ ომს იწყებდა ხოლმე. როგორც ჩანს, ის კვლავაც იყრის კენჭს; ასე რომ, ეს რა თქმა უნდა, ჩვენთვის შეშფოთების საგანია. ვიმედოვნებთ, რომ უსაფრთხოების სფეროში მიმდინარე თანამშრომლობის ფარგლებში, აშშ დაგვეხმარება თავდაცვითი იარაღით. მაგრამ, არა მგონია, რომ აქ რაიმეს მკაფიო ვადები იქნება დაწესებული“.

კითხვაზე, ხომ არაა მოსალოდნელი რუსეთთან კიდევ ერთი კონფლიქტი, სააკაშვილმა უპასუხა, რომ მართალია თბილისს ამის თავიდან აცილება სურს, მაგრამ "რუსეთი შეიძლება გეგმავდეს რამეს“.

“ახლა ამის ნაკლები საფრთხეა, ვიდრე ერთი წლის წინ იყო. ამაში წვლილი შეაქვს აშშ–რუსეთის გაუმჯობესებულ ურთიერთობებს. მაგრამ ეს არაა საბოლოოდ გადაწყვეტილი საქმე. ჩვენ ყველა ფხიზლად უნდა ვიყოთ,“– განაცხადა მან.

“არ არსებობს რაიმე ფორმალური უსაფრთხოების გარანტია,“– უპასუხა სააკაშვილმა, როცა მას ჰკითხეს მისცა თუ არა აშშ–მა რაიმე უსაფრთხოების გარანტია რუსეთის თავდასხმის შემთხვევაში. "ვფიქრობ, რომ ახლა ადგილი აქვს უფრო მეტ დიპლომატიას, რათა ახალი კონფლიქტი არ განმეორდეს. 2008 წლამდე არავის სჯეროდა, რომ ეს შესაძლებელი იყო. ახლა ადამიანებს ამის თავიდან არიდება სურთ; მათ იციან, რომ ეს შესაძლებელია“.