ვაჭრობის მსოფლიო ორგანიზაციაში (ვმო) რუსეთის გაწევრიანების თაობაზე საქართველოს პოზიცია "უცვლელია" და ის ვერ დაუჭერს ამ გადაწყვეტილებას მხარს, განაცხადა პრეზიდენტის პრესსპიკერმა მანანა მანჯგალაძემ 5 ოქტომბერს გამართულ ბრიფინგზე.

“საქართველო ვერ დაუჭერს მხარს რუსეთის გაწევრიანებას მსოფლიო სავაჭრო ორგანიზაციაში, მანამდე სანამ არ იქნება შესრულებული ის პირობები, რომელსაც საქართველოს ხელისუფლება აყენებს, მათ შორის ეს ეხება საბაჟო-გამშვები პუნქტების თემას და იმ საკითხების მთელ სპექტრსა და პრობლემებს, რომლებიც საქართველოსა და რუსეთს შორის არსებობს,“– განაცხადა მან.

რუსეთის ვმო–ში გაწევრიანებასთან დაკავშირებით ქართული მხარის მთავარი მოთხოვნა იყო საქართველოს კონფლიქტის ზონებში მდებარე ორი არალეგალური გამშვები პუნქტის - განთიადი-ადლერის (აფხაზეთში) და როკი-ქვემო ზარამაგის (ცხინვალის რეგიონი) ლეგალიზება.

რუსეთს ვმო–ში გაწევრიანებისათვის, რასაც უკვე წლებია ცდილობს, ორგანიზაციის წევრი ქვეყნების კონსენსუსი ესაჭიროება –  ამის მისაღწევად კი ასპირანტმა ქვეყანამ ორმხრივი მოლაპარაკებების გზით უნდა მოაგვაროს პრობლემები იმ ქვეყანასთან, რომელთანაც სავაჭრო სფეროში შეუთანხმებელი საკითხები გააჩნია.

22 სექტემბერს ნიუ–იორკში საერთაშორისო ეკონომიკური ალიანსის ფორუმზე ინვესტორებთან და სამთავრობო წრეებთან საუბრისას პრეზიდენტმა სააკაშვილმა განაცხადა, რომ საქართველო არ არის რუსეთის ვმო–ში გაწევრიანების ერთადერთი ხელისშემშლელი ფაქტორი. 

"მათ [ვმო] და რუსეთს შორის ბევრი საკითხი არსებობს,“ – იტყობინებოდა "როიტერი“ სააკაშვილის სიტყვებზე დაყრდნობით, "ამრიგად, მხოლოდ ჩვენ არ ვართ დარჩენილები და გარკვეული დრო უნდა მოგვცეთ, სანამ ბოლოები გავხდებით... შესაძლოა ჩვენ არც კი გავხდეთ ბოლოები. სწორედ ახლა, ქვეყნების გრძელი რიგი დგას“.