რუსეთის მთავრობის აპარატის უფროსის მოადგილემ იური უშაკოვმა განაცხადა, რომ აშშ–ის ვიცე–პრეზიდენტმა ჯო ბაიდენმა უთხრა პრემიერ–მინისტრ ვლადიმერ პუტინს 10 მარტს მოსკოვში გამართულ შეხვედრაზე, რომ ვაშინგტონმა ურჩია თბილისს არ შეუშალოს ხელი მოსკოვის გაწევრიანებას ვაჭრობის მსოფლიო ორგანიზაციაში (ვმო).

"ამერიკელებს ჰქონდათ საუბარი [თბილისთან], რომ საჭიროა არ შეუშალონ ხელი რუსეთის გაწევრიანებას,“ – იტყობინება "რია ნოვოსტი“ უშაკოვის სიტყვებზე დაყრდნობით.

თუმცა, მან ასევე განაცხადა, რომ აშშ–ს ხელისუფლების წარმომადგენლებისგან არ ყოფილა "პირდაპირი დაპირება“, რომ ისინი ამ საკითხს მოაგვარებდნენ ქართველებთან.

თეთრი სახლის წარმომადგენელმა განაცხადა თვის დასაწყისში, რომ საქართველო–რუსეთის დავა ვმო–ში გაწევრიანების პირობებზე "ორმხრივი საკითხია და არა სამმხრივი“.

უშაკოვმა ასევე განაცხადა, რომ რუსეთის პრემიერ–მინისტრმა ვლადიმერ პუტინმა განუცხადა ბაიდენს, რომ რუსეთის ვმო–ში გაწევრიანებასთან დაკავშირებული პრობლემები "პოლიტიკურია“.

"რუსეთის პრემიერ–მინისტრმა გულწრფელად აღნიშნა, რომ ეს პოლიტიკური პრობლემაა... და კმაყოფილება გამოხატა იმასთან დაკავშირებით, რომ ამერიკელებთან ამ კუთხით ყველა საკითხის დარეგულირება მოხდა,“ – განაცხადა უშაკოვმა.

უშაკოვის თქმით, დღევანდელ შეხვედრაზე ბაიდენმა და პუტინმა ასევე ახსენეს ბერნში მიმდინარე მოლაპარაკებები და იმედი გამოთქვეს, რომ პრობლემა მოგვარდება.

საქართველოს და რუსეთის დელეგაციების წარმომადგენლებს შორის მოლაპარაკებები ბერნში 10 მარტს დაიგეგმა.

იმავდროულად, რუსეთის საგარეო საქმეთა სამინისტროს ოფიციალურმა წარმომადგენელმა ალექსანდრე ლუკაშევიჩმა განუცხადა ჟურნალისტებს 10 მარტს, რომ ეს თემა განიხილეს ასევე ბაიდენმა და რუსეთის პრეზიდენტმა დიმიტრი მედვედევმა 9 მარტს გამართულ შეხვედრაზე.

"რუსეთის პრეზიდენტმა ხაზი გაუსვა ამ საკითხის პოლიტიზირების დაუშვებლობას, და საქართველოს ხელმძღვანელობის მცდელობების დაუშვებლობას ისეთი ელემენტები შეიტანონ დისკუსიებში, რომლებიც არ ეხება ვმო–ში გაწევრიანების პირობებს,“ – იტყობინებიან რუსული საინფორმაციო სააგენტოები ლუკაშევიჩის სიტყვებზე დაყრდნობით.