საქართველოს ხელისუფლება ცდილობს ყველაფერი ჯაშუშობის კონტექსტს მოარგოს, განაცხადა რუსეთის საგარეო საქმეთა სამინისტროს ოფიციალურმა წარმომადგენელმა ალექსანდრე ლუკაშევიჩმა 7 ივლისს.

"თითქმის ყველა ბრიფინგზე სხვადასხვა "ქართულ“ სიუჟეტებზე ვაკეთებთ კომენტარს“, – განაცხადა ლუკაშევიჩმა მოსკოვში გამართულ პრესკონფერენციაზე, როდესაც მას სთხოვეს საქართველოში ჯაშუშობის ბრალდებით ფოტოკორესპონდენტების დაკავების ფაქტზე გაეკეთებინა კომენტარი.  

"ჩვენთვის გასაკვირი არ არის, რომ საქართველოს ხელისუფლება "იარლიყებს აწებებს“ და ცდილობს ისე წარმოაჩინოს საქმე, თითქოს საკითხი "შემოგზავნილ ჯაშუშებს“ ეხებათ, ყველგან ჯაშუშობის კონტექსტის მორგება უნდათ. ეს კიდევ ერთხელ მიუთითებს "დემოკრატიის“ დონეზე საქართველოში, რის შესახებაც ბოლო დროს კრიტიკულ შენიშვნებს აკეთებენ სხვადასხვა ორგანიზაციები, კერძოდ კი გაეროს და ევროპის საბჭოს სპეციალური დაწესებულებები“, – განაცხადა ლუკაშევიჩმა.

შინაგან საქმეთა სამინისტრომ აღნიშნა მოკლე განცხადებაში, რომ დაკავებულია ოთხი ფოტოკორესპონდენტი, მათ შორის პრეზიდენტის ადმინისტრაციის პრესსამსახურის ფოტოგრაფი, რომელთაც „ბრალად ედებათ ერთ-ერთი უცხო ქვეყნის სპეცსამსახურის საფარქვეშ მოქმედი ორგანიზაციისთვის, საქართველოს ინტერესების საზიანოდ, მათი სამსახურებრივი მდგომარეობიდან გამომდინარე, სხვადასხვა სახის ინფორმაციის  მიწოდება“. მართალია, უცხო ქვეყანა დაკონკრეტებული არ არის, მაგრამ ნაკლებად მოსალოდნელია, რომ რუსეთის გარდა სხვა რომელიმე ქვეყანა იგულისხმებოდეს.