პარლამენტმა 21 ივლისს კონსტიტუციის შეცვლისთვის საჭირო ფორმალური პროცედურები დაიწყო.

ცვლილებების პროექტი, პრემიერ–მინისტრის სასარგებლოდ, მომავალი პრეზიდენტის ძალაუფლების შემცირებას ითვალისწინებს.

პარლამენტმა 21 ივლისს მიიღო დადგენილება, რომლითაც შეიქმნა 36–წევრიანი ჯგუფი, რომელიც საკონსტიტუციო ცვლილებების პროექტზე ერთთვიან საჯარო განხილვებს წარუძღვება – ეს ფორმალური პროცედურაა, რომელიც ნებისმიერი საკონსტიტუციო ცვლილებისთვის არის საჭიროა, რის შემდეგაც პროექტის პარლამენტში კენჭისყრა გახდება შესაძლებელი.

საკონსტიტუციო რეფორმაზე მომუშავე სახელმწიფო კომისიის მიერ 19 ივლისს მიღებული პროექტის საბოლოო ვარიანტის თანახმად, აღმასრულებელ შტოს პრემიერ–მინისტრი უხელმძღვანელებს, რომელსაც საპარლამენტო არჩევნებში ხმების უმრავლესობის მქონე პარტია წარადგენს.

პროექტი დამატებით უფლებამოსილებას ანიჭებს საკანონმდებლო ორგანოსაც, მათ შორის არის პრეზიდენტის ვეტოს დაძლევის პროცედურის გამარტივება.

პროექტის თანახმად, შემოთავაზებული ცვლილებები 2013 წლის 1 დეკემბრიდან უნდა შევიდეს ძალაში. გამონაკლისია პროექტის რამოდენიმე დებულება, მათ შორის ერთი თავი, რომელიც ადგილობრივ თვითმმართველობას ეხება, რომლებიც ძალაში უნდა შევიდეს 2011 წლის იანვრიდან.

პარლამენტის ვიცე–სპიკერმა მიხეილ მაჭავარიანმა განაცხადა 21 ივლისს, რომ პარლამენტი პროექტის განხილვას და შემდეგ კენჭისყრას სავარაუდოდ სექტემბრის შუა რიცხვებიდან დაიწყებს.

საპარლამენტო უმცირესობამ მოუწოდა დეპუტატებს არ იჩქარონ და არ დაამთხვიონ ერთთვიანი საჯარო განხილვის პროცესი აგვისტოში საზაფხულო არდადეგებს.

ქრისტიან–დემოკრატიული მოძრაობის და საპარლამენტო უმცირესობის ლიდერმა გიორგი თარგამაძემ განაცხადა დღევანდელ სხდომაზე, რომ ეს „ძალიან მნიშვნელოვანი“ პროცესია და ეს პროცესი მაღალი საზოგადოებრივი ნდობით უნდა სარგებლობდეს. მისი თქმით, პროცესი ყოვლისმომცველი და გამჭირვალე უნდა იყოს. „ჩვენ არ უნდა დავაწესოთ რაიმე ვადები და არ უნდა დავაჩქაროთ პროცესი,“ – განაცხადა მან.   

პარლამენტის თავმჯდომარემ დავით ბაქრაძემ უპასუხა, რომ საკონსტიტუციო რეფორმის პროცესი ერთი წლის წინ დაიწყო, როდესაც სახელმწიფო კომისია შეიქმნა, ხოლო თავად პროექტი 11 მაისიდან არსებობს, როდესაც სახელმწიფო კომისიამ პროექტის საბაზისო ვარიანტი დაამტკიცა.

„ეს პროცესი უკვე ერთი წელია მიმდინარეობს და ის გამჭირვალე იყო,“ – განაცხადა ბაქრაძემ. მისი თქმით, პარლამენტი პროექტის განხილვას აგვისტოს შუა რიცხვებში არ აპირებს, თუმცა პროცესის ძალიან გაჭიანურებასაც არ აპირებს.