საქართველოს გადაწყვეტილება 90–დღიანი უვიზო რეჟიმი შემოიღოს ჩრდილოეთ კავკასიაში მცხოვრები რუსეთის მოქალაქეებისთვის ხელს შეუწყობს საქართველოს ინტეგრაციას ამ რეგიონთან, რომელიც რუსეთის ფედერალური ძალების "ტერორის“ ქვეშ იმყოფება, განაცხადა საქართველოს შინაგან საქმეთა მინისტრმა ვანო მერაბიშვილმა.

"ეს ხალხი, ვინც ცხოვრობს ჩრდილოეთ კავკასიაში, დღეს იმყოფებიან ფედერალური ძალოვანო სტრუქტურების ტერორის ქვეშ,“ – განაცხადა მერაბიშვილმა ტელეკომპანია "რუსთავი 2“–თან ინტერვიუში, რომელიც 16 ოქტომბერს გადაიცა.

"ამიტომ, როგორც ეკონომიკურად, ისე პოლიტიკურად და ჰუმანიტარულად, ჩვენთვის არის მომგებიანი, რათა მოხდეს უფრო მეტი ინტეგრაცია ჩრდილოეთ კავკასიური ხალხისა საქართველოსთან, მიეცეთ საშუალება საქართველოს მეშვეობით დაუკავშირდნენ დანარჩენ დასავლურ სამყაროს და რაც ყველაზე მნიშვნელოვანია, მე ვფიქრობ ტურისტების რაოდენობა გაიზრდება; ეს ადამიანები ჩამოვლენ საქართველოში საკუთარი ბიზნესის განსახორციელებლად, დასასვენებლად, სამკურნალოდ,“ – განაცხადა მერაბიშვილმა.

რუსეთის საგარეო საქმეთა სამინისტრომ 14 ოქტომბერს განაცხადა, რომ თბილისის გადაწყვეტილება ჩრდილოეთ კავკასიის რესპუბლიკებში მცხოვრები რუსეთის მოქალაქეებისთვის უვიზო რეჟიმის ცალმხრივად დაწესების თაობაზე "პროვოკაცია“ და რეგიონის "დესტაბილიზაციის" მცდელობაა. ეს გადაწყვეტილება ქართულმა ოპოზიციამაც გააკრიტიკა.

მერაბიშვილის ინტერვიუს ნაწყვეტი ტელეკომპანია "რუსთავი 2“–მა თავის გადაცემა „კურიერი P.S.“ –ის სიუჟეტში გამოიყენა, რომელიც საქართველოს ამ გადაწყვეტილების გამართლებას მიეძღვნა.

"შეიძლება არაფერი გაგეგებოდეთ პოლიტიკისა; შეიძლება არ იცოდეთ სად არის რუკაზე ყაბარდო-ბალყარეთი, ან ყარაჩაი-ჩერქეზეთი... მაგრამ ერთი უტყუარი ნიშნით ყოველთვის მიხვდებით, რომ საქართველომ რაღაც სწორად გააკეთა - იმით რომ რუსეთი გაბრაზდა,“ – განაცხადა ჟურნალისტმა თავის სიუჟეტში.