პარიზში არსებული მედიის უფლებების დამცველი ჯგუფის "რეპორტიორები საზღვრებს გარეშე“–ს (Reporters Sans Frontières - RSF) მიერ 20 ოქტომბერს გამოქვეყნებულ ყოველწლიურ რეიტინგში საქართველოში პრესის თავისუფლების ინდექსი გაუარესდა,

178 ქვეყანას შორის საქართველოს 99–ე ადგილი უკავია 27 ქულით. კვლევა 2009 წლის სექტემბრიდან 2010 წლის სექტემბრამდე პერიოდს მოიცავს. გასული წლის ანალოგიურ კვლევაში საქართველოს 81–ე ადგილი ეკავა 18.83 ქულით. ინდექსის თანახმად, რაც უფრო მეტია ქულა მით უარესია ქვეყანაში მედიის მდგომარეობა.

"რეპორტიორები საზღვრებს გარეშე“ თავის ყოველწლიურ კვლევას 43 კრიტერიუმის საფუძველზე ადგენს, რომელთა შორისაა ჟურნალისტებზე ძალადობა, ცენზურა, ასევე თუ რამდენად ხდება ამ დარღვევებზე პასუხისმგებელი პირების დასჯა. ორგანიზაციის განცხადებით, შეფასება ხდება კითხვარების მეშვეობით, რომლებიც შესავსებათ მის პარტნიორ ორგანიზაციებს ან სხვა დამოუკიდებელ წყაროებს ეგზავნებათ ქვეყნებში, რომელთა შესწავლაც ხდება.