საარჩევნო რეფორმის პროცესში ჩართულმა ზოგიერთმა ოპოზიციურმა პარტიამ გააკრიტიკა პრეზიდენტ სააკაშვილის განცხადება იმის შესახებ, რომ რომ ყველა თემაზე შეიძლება მოლაპარაკებები, გარდა მაჟორიტარული სისტემის შეცვლისა.

ეს საკითხი რვა ოპოზიციური პარტიის მიერ მომზადებულ ერთობლივ ხედვაში ერთ–ერთი იმ შეთავაზებათაგანია, რომლებზეც ხელისუფლების წარმომადგენლები მოლაპარაკებების დაწყებამდე აცხადებდნენ, რომ საუბარი სუფთა ფურცლიდან, "მზა დოკუმენტებისა“ და "ულტიმატუმების“ გარეშე უნდა დაწყებულიყო.

“შრომა ულტიმატუმად შეგვიფასეს და ამ დროს სააკაშვილმა თვითონ წამოგვიყენა ულტიმატუმი,“– განაცხადა რესპუბლიკური პარტიის წარმომადგენელმა დავით ბერძენიშვილმა გაზეთ "რეზონანსთან“ ინტერვიუში, რომელიც 15 ნოემბერს გამოქვეყნდა.

თუმცა მან ასევე აღნიშნა, რომ ხელისუფლება ყოველთვის ეცდება პრობლემების შექმნას, რადგან საარჩევნო გარემოს ცვლილებაზე მოლაპარაკებათა პროცესის დაწყებით "გახარებული არ არის“.

“ჩვენ მაქსიმალურად უნდა გამოვიყენოთ არსებული ფაქტორები, რომ ხელისუფლება ამ პროცესიდან ვერ გაიქცეს და თუ გაიქცევა, ამით დაზარალდეს,“– განაცხადა მან.

იმავდროულად, დეპუტატმა ქრისტიან–დემოკრატიული მოძრაობიდან, ლევან ვეფხვაძემ პარლამენტის ბიუროს დღევანდელ სხდომაზე პრეზიდენტის განცხადება შეაფასა, როგორც "წინაპირობა“, რაც პრობლემას შეუქმნის მოლაპარაკებების პროცესს, რომელიც რეგულარული ფორმატით მიმდინარე ოთხშაბათიდან დაიწყება. 

“საარჩევნო სისტემაზე საუბარი მანამ, სანამ მოლაპარაკებები დაიწყო, მე ვფიქრობ, არის დიდი შეცდომა პრეზიდენტ სააკაშვილის მხრიდან,“– განაცხადა ლევან ვეფხვაძემ, "რომელ რაიონს როგორი წარმომადგენლობა უნდა ჰყავდეს [პარლამენტში] ეს უნდა გადაწყვიტოს იმ ფორმატმა, რომელზეც ჩვენ შევთანხმდით და რა პროცესიც დაიწყო“.

იურიდიულ საკითხთა კომიტეტის თავმჯდომარემ პავლე კუბლაშვილმა მმართველი პარტიიდან განაცხადა, რომ პრეზიდენტის განცხადება არანაირი "წინაპირობა“ არ ყოფილა და არც ისაა "სადავო“, რომ პარლამენტში რაიონებს თავისი წარმომადგენლობა უნდა ჰყავდეთ.
 
“ყველა თემასთან დაკავშირებით იქნება მსჯელობა საკითხის შემსწავლელ ჯგუფში. მაგრამ არის თემები, რომელსაც ალტერნატივა არ აქვს – ვერავინ ვერ იტყვის, ვერცერთი პარტია, რომ რომელიმე რაიონს არ უნდა ჰყავდეს წარმომადგენელი საქართველოს პარლამენტში,“– განაცხადა მან.