დეპუტატმა მმართველი პარტიიდან პავლე კუბლაშვილმა განაცხადა 9 თებერვალს საარჩევნო საკითხებზე მომუშავე ინტერპარტიული ჯგუფის შეხვედრის შემდეგ, რომ ბიომეტრიული პირადობის მოწმობების გამოყენება არჩევნების დღეს პრობლემებს შექმნის.

ამომრჩეველთა სიების ფორმირება ბიომეტრიული პარამეტრების (ხელების ათივე თითის ანაბეჭდის ელექტრონული სურათის და ბიომეტრიული ფოტოსურათის) შემცველი პირადობის მოწმობების საფუძველზე იმ ერთიანი ხედვის ნაწილია, რომელიც საარჩევნო კოდექსში შესატანი ცვლილებების ფარგლებში რვა ოპოზიციურმა პარტიამ შეიმუშავა.

პარლამენტის იურიდიულ საკითხთა კომიტეტის თავმჯდომარემ პავლე კუბლაშვილმა, რომელიც მმართველ პარტიას წარმოადგენს საარჩევნო სისტემის რეფორმირებაზე მიმდინარე მოლაპარაკებებში, განუცხადა ჟურნალისტებს, რომ იგი არჩევნების დღეს ამ სისტემის გამოყენების წინააღმდეგია.    

"არჩევნების დღეს ამ მოწმობების გამოყენება კიდევ უფრო მეტ პრობლემას შექმნის. ამიტომ, ამ ნაწილში იმ მოსაზრებას, რომ ეს ბიომეტრიული პირადობის მოწმობები გამოყენებული უნდა იქნას არჩევნების დღეს, ვერ გავიზიარებ. ჩვენ ვეცდებით, რომ სხვა ალტერნატიული პოზიციები შევაჯეროთ,“ – განაცხადა კუბლაშვილმა.

რესპუბლიკური პარტიის ლიდერმა დავით უსუფაშვილმა განაცხადა შეხვედრის შემდეგ, რომ ხელისუფლება ბიომეტრიული პირადობის მოწმობების გაცემას ივნისიდან დაიწყებს, თუმცა, მისი თქმით, ხელისუფლება არ არის დარწმუნებული რამდენად შესაძლებელი იქნება ამ მოწმობების გაცემა ყველა მოქალაქეზე 2012 წელს დაგეგმილი საპარლამენტო არჩევნებისთვის. მან განაცხადა, რომ ხელისუფლებას გარკვეული ეჭვები გააჩნია არჩევნებში ბიომეტრიული პირადობის მოწმობების გამოყენებასთან დაკავშირებით. უსუფაშვილმა ასევე აღნიშნა, რომ გადაწყდა, რომ მმართველი პარტია თავის საბოლოო პოზიციას ამ საკითხზე ერთ კვირაში მოამზადებს და პასუხს მომდევნო შეხვედრაზე წარმოადგენს.