• ოპონენტების თქმით, შეზღუდვა საკმარისი არ არის, საჭიროა სრული აკრძალვა.

მმართველმა პარტიამ მოამზადა მაუწყებლობის შესახებ კანონში ცვლილებები, რომელიც მიღების შემთხვევაში, შეზღუდავს ოფშორულ ზონებში დარეგისტრირებული ფირმების უფლებას ფლობდნენ წილებს ტელევიზიებში.

კანონპროექტის თანახმად, რომელიც მმართველი პარტიის დეპუტატებმა მოამზადეს და საკანონმდებლო ინიციატივის სახით 12 ნოემბერს დარეგისტრირდა, მაუწყებლობის სფეროში ლიცენზიის მფლობელი არ შეიძლება იყოს ოფშორულ ზონაში რეგისტრირებული იურიდიული პირი, რომლის "წილის ან აქციების 10%–ზე მეტს პირდაპირ ან ირიბად, ცალკე ან სხვა პირებთან ერთობლივად (ჯამურად) ფლობს (ფლობენ) ოფშორულ ზონაში რეგისტრირებული პირი (პირები)“.

თუ ამ ნორმას პარლამენტი მიიღებს, მაშინ ეს პირდაპირ შეეხება ტელეკომპანია "რუსთავი 2“–ს.

კომუნიკაციების ეროვნული კომისიის ინფორმაციით, „რუსთავი 2“–ის აქციების 70%-ის მფლობელია Degson Limited – ბრიტანეთის ვირჯინიის კუნძულებზე დარეგისტრირებული კომპანია, რომლის შესახებ სხვა ინფორმაცია მიუწვდომელია. ტელეკომპანიის დანარჩენი 30% საქართველოს ინდუსტრიული ჯგუფის საკუთრებაშია, რომლის დამფუძნებელია მმართველი პარტიის დეპუტატი დავით ბეჟუაშვილი – დაზვერვის სამსახურის უფროსის, გელა ბეჟუაშვილის ძმა.

წარმოდგენილი საკანონმდებლო ცვლილების მიღების შემთხვევაში, "რუსთავი 2“–ს მოუწევს აქციების იმგვარად გადანაწილება, რომ Degson Limited–ის წილი შემცირდეს და 10%–ს არ აღემატებოდეს. 

კანონპროექტის მიხედვით, ამ პროცედურების განხორციელებისთვის ბოლო ვადა 2011 წლის 1 ივნისია.

მედია საშუალებების მფლობელთა ვინაობის შესახებ ინფორმაციის ნაკლებობა, კერძოდ კი "რუსთავი 2"–თან და "იმედთან" მიმართებაში, საქართველოში დიდი ხანია დავის საგანს წარმოადგენს.

ოქტომბერში საქართველოს ხელისუფლებამ გამოაცხადა, რომ მიღებული იქნებოდა იმგვარი საკანონმდებლო ცვლილება, რომელიც  მედია მფლობელთა გამჭირვალობას „სრულად“ უზრუნველყოფდა.

26 ოქტომბერს პარლამენტის თავმჯდომარემ დავით ბაქრაძემ ინიციატივის გამოცხადებისას, ასევე განაცხადა, რომ უზრუნველყოფილი იქნებოდა მედია–საშუალებების დაფინანსების გამჭირვალობაც.

თუმცა 12 ნოემბერს ინიცირებული კანონპროექტი ფინანსური გამჭირვალობის საკითხებს არ მოიცავს.

“ჩვენ ამ ინიციატივით მიზნად არ ვისახავთ დამატებით, პირდაპირი ცვლილებების შეტანას, რომელიც უკავშირდება ფინანსურ გამჭირვალობას, თუმცა ბუნებრივია, გაიმართება კონსულტაციები და კონსულტაციების შედეგად შეიძლება რაღაც სიახლე იყოს. ამ ეტაპზე ჩვენი მიზანია კონკრეტული საკითხის გადაჭრა, რომელიც უკავშირდება მფლობელთა შესახებ ინფორმაციის გამჭირვალობას,“– განაცხადა პროექტის პრეზენტაციაზე მისმა ერთ–ერთმა ავტორმა, იურიდიულ საკითხთა საპარლამენტო კომიტეტის თავმჯდომარის მოადგილემ ჩიორა თაქთაქიშვილმა 12 ნოემბერს.

"უზარმაზარი ხვრელია დატოვებული, რადგან ჩვენ კვლავაც არ გვეცოდინება ვის ეკუთვნის მედია–საშუალების 10%. მითუმეტეს ფინანსური გამჭირვალობის გარეშე, 10%–იანი ოფშორიდან შეიძლება წამოვიდეს მთელი ფინანსური ნაკადები, რომელთა წარმომავლობის შესახებ ინფორმაცია არ იქნება გამჭირვალე,“– განუცხადა Civil.ge-ს ვახტანგ ხმალაძემ.

ხმალაძე წევრია ექსპერტებისა და მედია აქტივისტების იმ ჯგუფის, რომელმაც  მედიასთან დაკავშირებულ საკითხებზე უფრო ფართო ცვლილებათა პაკეტი შეიმუშავა, რომელიც საკანონმდებლო წინადადების სახით ასევე 12 ნოემბერს იქნა პარლამენტში შეტანილი.

ეს წინადადებები ეხება არა მხოლოდ მედია–მფლობელთა გამჭირვალობის საკითხებს, არამედ ისეთ თემებსაც მოიცავს, როგორიცაა საჯარო ინფორმაციასთან ხელმისაწვდომობის გაუმჯობესება.

შემოთავაზება ასევე შეიცავს ზომებს ხანგრძლივი სასამართლო განხილვების ვადების შესამცირებლად ისეთ საქმეებთან დაკავშირებით, რომლებიც უკავშირდება სახელმწიფო სტრუქტურების მიერ საჯარო ინფორმაციის გაცემაზე უარის თქმას და ამგვარ საქმეებზე სასამართლო ბაჟის გაუქმებას. ის ასევე მოიცავს მაუწყებელთა ლიცენზირების საკითხებს, ასევე სამაუწყებლო მედიაში ინტერესთა კონფლიქტთან და რეკლამის მკაფიო რეგულაციებთან დაკავშირებულ პრობლემებს.

იურიდიულ საკითხთა საპარლამენტო კომიტეტის თავმჯდომარემ პავლე კუბლაშვილმა განაცხადა, რომ შესაძლებელია მხედველობაში მიღება ჯგუფის მხოლოდ იმ წინადადებების, რომელიც მედიის მესაკუთრეთა გამჭირვალობას ეხება.

პარლამენტის თავმჯდომარემ დავით ბაქრაძემ მაუწყებლობის შესახებ კანონში ცვლილებების პირველი მოსმენით განხილვამდე კანონპროექტთა ავტორებს ექსპერტების, არასამთავრობო და საერთაშორისო ორგანიზაციის წარმომადგენლებთან შეხვედრისკენ და მათი მხრიდან გამოთქმული არგუმენტირებული შენიშვნების გათვალისწინებისკენ მოუწოდა.