რამდენიმე ასეულმა დევნილმა 21 დეკემბერს პარლამენტის წინ საპროტესტო აქცია გამართა თბილისში არსებული საცხოვრებელი ფართებიდან მათი დაგეგმილი გამოსახლების წინააღმდეგ.

საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს განცხადებით, დევნილებს, რომლებიც თბილისში მდებარე 25–მდე შენობაში „სპონტანურად, მთავრობის თანხმობის გარეშე“ არიან  შესახლებული, მოუწევთ შენობების დაცლა და სამეგრელოს ან კახეთის რეგიონში დასახლება. სამინისტროს თქმით, ამ რეგიონებში გამოყოფილი ფართები დევნილებს საკუთრებაში გადაეცემათ.

ბოლოს, დევნილების მასშტაბური გამოსახლების პროცესს ივლისსა და აგვისტოში ჰქონდა ადგილი, რომლის დროსაც, უფლებადამცველები იძულებით გადაადგილებულ პირთა უფლებების შელახვის ფაქტებზე მიუთითებდნენ.

ამჯერად, ხელისუფლებამ წინასწარ წერილობით გააფრთხილა დევნილები, რომ თვის ბოლომდე მოუწევდათ შენობების დაცლა, რასაც მწვავე პროტესტი მოყვა. თუმცა, როგორც თბილისის საკრებულოში წარმომადგებლობის მქონე ოპოზიციურმა პარტიებმა განაცხადეს, შეტყობინება კანონიერად ვერ ჩაითვლება, ვინაიდან მას ხელს არც ერთი უფლებამოსილი პირი არ აწერს.

უკანასკნელი ინფორმაციის თანახმად, ხელისუფლებამ დევნილების გამოსახლების ვადა 15 იანვრამდე გააგრძელა.

21 დეკემბერს პარლამენტის წინ შეკრებილმა დევნილებმა განაცხადეს, რომ ვადის გახანგრძლივებით მათი პრობლემა არ გვარდება, ვინაიდან ისინი თბილისში ითხოვენ საცხოვრებელ ფართებს, და არა რეგიონებში, სადაც, როგორც დევნილები აცხადებენ, ისინი სამუშაოს გარეშე დარჩებიან.